អនុអធិការបតីអាល្លឺម៉ង់ លោក Robert Habeck បាននិយាយថា អាល្លឺម៉ង់បានអំពាវនាវដល់ប្រទេសចិនឲ្យគោរពតាមការដាក់ទណ្ឌកម្មរបស់សហភាពអឺរ៉ុប (EU) ប្រឆាំងនឹងរុស្ស៊ី ជាពិសេសទាក់ទងនឹងការផ្គត់ផ្គង់ទំនិញប្រើបានទាំងក្នុងកម្មវិធីស៊ីវិល និងយោធា ដែលអាចយកទៅជួយបំពេញដល់មហិច្ឆតាសង្គ្រាម។ នេះបើយោងតាមសារព័ត៌មាន Bloomberg។

លោក Habeck បានធ្វើសេចក្តីប្រកាសនេះ អំឡុងដំណើរទស្សនកិច្ចរបស់លោកទៅកាន់ទីក្រុងសៀងហៃ និងបន្ទាប់ពីមានកិច្ចពិភាក្សាជាមួយរដ្ឋមន្ត្រីក្រសួងពាណិជ្ជកម្មចិន លោក Wang Wentao និងរដ្ឋមន្ត្រីក្រសួងឧស្សាហកម្ម និងបច្ចេកវិទ្យា លោក Jin Zhuanglong ក្នុងទីក្រុងប៉េកាំង។ លោកបញ្ជាក់ថា សហភាពអឺរ៉ុប នឹងមិនទទួលយកការគេចវេសពីទណ្ឌកម្មដែលដាក់លើរុស្ស៊ីនោះឡើយ។

លោកអនុអធិការបតី បាននិយាយថា៖ «ប្រសិនបើផលិតផលដែលប្រើប្រាស់នៅក្នុងឧស្សាហកម្មយោធា នឹងលែងត្រូវបាននាំចូលពីប្រទេសចិន ការធ្វើបែបនេះក៏នឹងជួយដល់ទំនាក់ទំនងសេដ្ឋកិច្ច រវាងប្រទេសយើងទាំង២ ផងដែរ»។

លោក Habeck បានគូសបញ្ជាក់ថា ពាណិជ្ជកម្ម រវាងចិន និងរុស្ស៊ី បានកើនឡើងជាង ៤០ភាគរយ កាលពីឆ្នាំមុន ដោយជាងពាក់កណ្តាលនៃកំណើននេះ មានចំណែកមកពីធនធានថាមពល និងនៅសល់ពីនោះមានពាក់ព័ន្ធនឹងទំនិញប្រើប្រាស់បានទាំងស៊ីវិល និងយោធា។ លោកបានបន្ថែមថា លោកបានលើកឡើងពីបញ្ហានេះ នៅក្នុងកិច្ចពិភាក្សាជាមួយមន្ត្រីចិន បន្ទាប់ពីពួកគេបានត្អូញត្អែរអំពីប្រទេសអាល្លឺម៉ង់ ដែលធ្វើឲ្យស្មុគស្មាញដល់ការវិនិយោគរបស់ចិន៕