រដ្ឋអាជ្ញាសាធារណៈក្នុងដែនដីនូវ៉ែល កាលេដូនី កាលពីថ្ងៃអាទិត្យ (ទី២៣ ខែមិថុនា) បាននិយាយថា មេដឹកនាំដែលគាំទ្រឯករាជ្យ នៅក្នុងទឹកដីប៉ាស៊ីហ្វិករបស់បារាំងមួយនេះ ត្រូវបានផ្ទេរទៅពន្ធនាគារ ក្នុងប្រទេសបារាំងដីគោក ដើម្បីរង់ចាំការកាត់ទោសលើការចោទប្រកាន់ទាក់ទងនឹងភាពចលាចល ២សប្តាហ៍មុន ក្នុងខែឧសភា ដែលបានបណ្តាលឲ្យមនុស្ស ៩នាក់ ស្លាប់។

រដ្ឋអាជ្ញា លោក Yves Dupas បានឲ្យដឹងនៅក្នុងសេចក្តីថ្លែងការណ៍មួយថា លោក Christian Tein ដែលជាមេដឹកនាំជនជាតិដើមភាគតិច Kanak របស់គណបក្សគាំទ្រឯករាជ្យដែលត្រូវបានគេស្គាល់ថា ជាអង្គភាពសម្របសម្រួលសកម្មភាពទីលាន ត្រូវបានបញ្ជូនតាមយន្តហោះទៅកាន់ប្រទេសបារាំងដីគោកនៅយប់ថ្ងៃសៅរ៍ រួមជាមួយសកម្មជន ៦នាក់ផ្សេងទៀត។

លោក Dupas បានប្រាប់ថា សកម្មជន Kanak ទាំង ៧នាក់ ត្រូវបានផ្ទេរទៅឃុំខ្លួនមុនការកាត់ទោស តាម «យន្តហោះឈ្នួលមួយ» ដោយសារតែ «ភាពរសើបនៃនីតិវិធី»។

គួរបញ្ជាក់ថា ប្រជាជនជនជាតិដើម Kanak បានស្វែងរកអស់ជាច្រើនទសវត្សរ៍មកហើយ ដើម្បីផ្តាច់ខ្លួនពីប្រទេសបារាំង ដែលបានគ្រប់គ្រងដែនដីនូវ៉ែល កាលេដូនីជាលើកដំបូងក្នុងឆ្នាំ១៨៥៣។

អំពើហិង្សាបានផ្ទុះឡើកាលពីថ្ងៃទី១៣ ខែឧសភា ដើម្បីឆ្លើយតបទៅនឹងការប៉ុនប៉ងរបស់រដ្ឋាភិបាលរបស់ប្រធានាធិបតីបារាំង លោក Emmanuel Macron ដែលចង់ធ្វើវិសោធនកម្មរដ្ឋធម្មនុញ្ញបារាំង និងផ្លាស់ប្តូរបញ្ជីបោះឆ្នោតនៅដែនដីនេះ។ បារាំងបានប្រកាសដាក់រដ្ឋក្នុងភាពអាសន្នសម្រាប់ដែនដីនេះ រយៈពេល ២ថ្ងៃក្រោយមក ដោយបានប្រញាប់ប្រញាល់ពង្រឹងកម្លាំងទាហានរាប់រយនាក់ ដើម្បីជួយនគរបាលបង្ក្រាបការបះបោរ ដែលរួមមានការបាញ់ប្រហារ ការប៉ះទង្គិចគ្នា ការឆក់ប្លន់ និងការដុតជាដើម៕