រដ្ឋធានី Mogadishu របស់ប្រទេសសូម៉ាលី បានជួបគ្រោះទឹកជំនន់ធ្ងន់ធ្ងរ ដែលបានធ្វើឲ្យផ្លូវថ្នល់ពិបាកធ្វើចរាចរណ៍យ៉ាងខ្លាំង ។
អ្នកស្រុក និយាយប្រាប់ទីភ្នាក់ងារព័ត៌មានរ៉យទ័រថា ទឹកជំនន់ដ៏គំហក់ បណ្តាលឲ្យខូចខាតច្រើនដល់ទ្រព្យសម្បត្តិ និងហេដ្ឋារចនាសម្ព័ន្ធ និងបង្កការភ័យខ្លាចដល់សុវត្ថិភាពប្រជាពលរដ្ឋផងដែរ ។
គ្រោះទឹកជំនន់ញឹកញាប់ និងធ្ងន់ធ្ងរ នៅក្នុងរដ្ឋធានី Mogadishu បានកើនឡើងក្នុងរយៈពេលជាច្រើនឆ្នាំកន្លងមកនេះ ដែលបង្កឡើងដោយសារផលប៉ះពាល់ពីបម្រែបម្រួលអាកាសធាតុ ។
បញ្ហាបម្រែបម្រួលអាកាសធាតុ បានក្លាយជាក្តីកង្វល់សកលលោក ក្នុងនោះតំបន់អាហ្វ្រិកខាងកើត រួមទាំងប្រទេសសូម៉ាលី បានមើលឃើញអាកាសធាតុអាក្រក់បែបនេះ កើនឡើង ។
យោងតាមការអះអាងរបស់គណៈកម្មការអន្តររដ្ឋាភិបាលស្តីពីបម្រែបម្រួលអាកាសធាតុ បានឲ្យដឹងថា ហេតុការណ៍អាកាសធាតុអាក្រក់ញឹកញាប់ ដូចជាគ្រោះរាំងស្ងួត និងគ្រោះទឹកជំនន់ នៅតាមតំបន់ទាំងនេះ បានកើនឡើងដោយសារការឡើងកម្តៅផែនដី ៕