ឧត្តមសេនីយ៍ជាន់ខ្ពស់របស់អាមេរិក កំពុងធ្វើដំណើរដ៏កម្រមួយទៅកាន់ទ្វីបអាហ្រ្វិក ដើម្បីពិភាក្សាអំពីវិធីបន្តរក្សាវត្តមានយោធាអាមេរិកមួយចំនួន នៅអាហ្វ្រិកខាងលិច បន្ទាប់ពីនីហ្សេបានសម្រេចមិនទទួលយកទ័ពអាមេរិក ដើម្បីចាប់ដៃដៃគូជាមួយរុស្ស៊ី ដែលនេះជាឧបសគ្គដ៏ធំមួយ សម្រាប់ទីក្រុងវ៉ាស៊ីនតោន។

មុនពេលចុះចតនៅប្រទេសបុតស្វាណា នៅថ្ងៃចន្ទ (ទី២៤ ខែមិថុនា) ដើម្បីចូលរួមក្នុងពិធីជួបជុំប្រមុខការពារជាតិអាហ្វ្រិក អគ្គបញ្ជាការកងទ័ពអាកាស លោក C.Q. Brown ដែលជាប្រធានអគ្គសេនាធិការចម្រុះ បានប្រាប់អ្នកសារព័ត៌មានថា លោកនឹងនិយាយជាមួយដៃគូជាច្រើន នៅក្នុងតំបន់នេះ។

លោក Brown បានប្រាប់អ្នកសារព័ត៌មានដែលធ្វើដំណើរជាមួយលោកថា៖ «ខ្ញុំពិតជាមើលឃើញឱកាសមួយចំនួន ហើយមានប្រទេសដែលយើងកំពុងធ្វើការជាមួយនៅអាហ្វ្រិកខាងលិច»។ លោកបានបន្ថែមថា ការកសាងទំនាក់ទំនងទាំងនោះអាច «ផ្តល់ឱកាសឲ្យយើងបង្ហាញសមត្ថភាពខ្លះៗ ដែលយើងមានក្នុងប្រទេសនីហ្សេ នៅទីតាំងផ្សេងទៀត»។

តែលោក Brown បានបដិសេធមិនប្រាប់ថា ប្រទេសណាខ្លះ ស្ថិតក្រោមការពិចារណានោះទេ។ ប៉ុន្តែមន្ត្រីអាមេរិកម្នាក់បានប្រាប់សារព័ត៌មាន Reuters ថា រដ្ឋបាលរបស់ប្រធានាធិបតី លោក Joe Biden បានសន្ទនាជាដំបូងជាមួយប្រទេសនានា ក្នុងនោះរួមមានប្រទេសបេនីន កូតឌីវ័រ និងហ្គាណាផងដែរ។

ហើយទោះជាយ៉ាងណាក៏ដោយ យោធាអាមេរិកមិនត្រូវបានគេរំពឹងថា នឹងអាចចម្លងតាមដានឥទ្ធិពលរបស់ខ្លួនក្នុងការប្រឆាំងភេរវកម្ម នៅប្រទេសនីហ្សេ ឆាប់ៗនេះឡើយ។ ជាពិសេស ការប្រាប់ឲ្យចាកចេញនេះ មានន័យថា អាមេរិកបាត់បង់មូលដ្ឋានទ័ពអាកាស 201 ដែលខ្លួនបានសាងសង់នៅជិតទីក្រុង Agadez កណ្តាលប្រទេសនីហ្សេ ក្នុងតម្លៃជាង ១០០លានដុល្លារ៕