ក្រសួងសុខាភិបាលរបស់តំបន់ហ្កាហ្សាបានប្រាប់ឲ្យដឹងថា ការវាយប្រហារតាមផ្លូវអាកាសរបស់អ៊ីស្រាអែល លើគ្លីនិកវេជ្ជសាស្ត្រ ក្នុងដែនដីនេះ បានសម្លាប់ប្រធាននាយកដ្ឋានរថយន្តសង្គ្រោះ និងសង្គ្រោះបន្ទាន់របស់តំបន់ហ្កាហ្សា ខណៈយោធាអ៊ីស្រាអែលបាននិយាយថា ការវាយប្រហារនេះ បានសម្លាប់មេបញ្ជាការប្រដាប់អាវុធជាន់ខ្ពស់របស់ក្រុមហាម៉ាស។
ក្រសួងសុខាភិបាលបានប្រាប់ថា ការសម្លាប់នាយក លោក Hani al-Jaafarawi បាននាំឲ្យចំនួនបុគ្គលិកពេទ្យដែលត្រូវបានសម្លាប់ដោយការវាយប្រហាររបស់អ៊ីស្រាអែល គិតចាប់តាំងពីថ្ងៃទី៧ ខែតុលា ឡើងដល់ ៥០នាក់ ហើយយ៉ាងហោចណាស់ ៣០០នាក់ទៀត ត្រូវបានឃុំខ្លួន រហូតមកដល់ពេលនេះ។
តែនៅក្នុងសេចក្តីថ្លែងការណ៍របស់ខ្លួន យោធាអ៊ីស្រាអែលបាននិយាយថា ការវាយប្រហារនេះសំដៅទៅលើលោក Mohammad Salah ដែលខ្លួនបាននិយាយថា ជាអ្នកទទួលខុសត្រូវក្នុងការអភិវឌ្ឍអាវុធរបស់ក្រុមហាម៉ាស។
ចំណែកនៅទីក្រុង Rafah ក្បែរព្រំដែនជាមួយប្រទេសអេហ្ស៊ីប កងកម្លាំងអ៊ីស្រាអែលដែលបានគ្រប់គ្រងផ្នែកខាងកើត ភាគខាងត្បូង និងភាគកណ្តាលនៃទីក្រុង បានបន្តការវាយឆ្មក់របស់ពួកគេចូលទៅក្នុងតំបន់ភាគខាងលិច និងភាគខាងជើង។
កាលពីថ្ងៃអាទិត្យ (ទី២៣ ខែមិថុនា) អ្នកស្រុកបាននិយាយថា រថក្រោះអ៊ីស្រាអែលបានរុលទៅដល់ជាយនៃជំរុំជនភៀសខ្លួន Mawasi នៅភាគពាយព្យរបស់ទីក្រុង Rafah ដោយបង្ខំឲ្យគ្រួសារជាច្រើនចាកចេញពីភាគខាងជើងឆ្ពោះទៅកាន់ទីក្រុង Khan Younis និងទីក្រុង Deir Al-Balah នៅភាគកណ្តាលតំបន់ហ្កាហ្សា ជាទីក្រុងតែមួយគត់នៅដែនដីនេះ ដែលរថក្រោះមិនទាន់បានចូលទៅលុកលុយនៅឡើយ៕