ក្រុមមន្ត្រីបាននិយាយកាលពីថ្ងៃចន្ទថា នគរបាលនៅក្នុងប្រទេសប៉ាគីស្ថាន បានចាប់ខ្លួនមនុស្ស ២៣នាក់ដែលត្រូវបានចោទប្រកាន់ថា ជាផ្នែកនៃហ្វូងមនុស្សដែលបានសម្លាប់បុរសម្នាក់ត្រូវបានគេសង្ស័យថា បានប្រមាថគម្ពីកូរ៉ាន ជាសៀវភៅដ៏ពិសិដ្ឋរបស់សាសនាឥស្លាម។

ជនសង្ស័យទាំងនោះ ត្រូវបានចោទប្រកាន់ពីបទមនុស្សឃាត និងដុតប៉ុស្តិ៍នគរបាលនៅតំបន់ Madyan ដែលជាតំបន់ទេសចរណ៍ ក្នុងខេត្ត Khyber Pakhtunkhwa ភាគពាយ័ព្យប្រទេសប៉ាគីស្ថាន ជាទីដែលហ្វូងមនុស្ស បានសម្លាប់បុរសនោះ កាលពីថ្ងៃព្រហស្បតិ៍ និងដុតសាកសពរបស់គាត់។

ដំបូងឡើយ នគរបាល បានកំណត់អត្តសញ្ញាណបុរស ដែលត្រូវសម្លាប់នោះថា ជា Mohammad Ismail ប៉ុន្តែនៅពីថ្ងៃចន្ទនេះ បាននិយាយបន្ទាប់ពីការស៊ើបអង្កេតថា ពួកគេ បានសន្និដ្ឋានថា ឈ្មោះរបស់គាត់ គឺ Mohammad Salman ។ ពួកគេ បាននិយាយថា គ្រួសារគាត់ មិនទាន់បានទាក់ទងទៅនគរបាល ដើម្បីទទួលសពគាត់ នៅឡើយទេ។

ពុំមានសេចក្តីថ្លែងការណ៍ផ្លូវការណាមួយពីនគរបាលនៅក្នុងរដ្ឋ Punjab ជាកន្លែងដែលបុរសនោះ រស់នៅនោះទេ។

ទោះបីជាយ៉ាងណាក៏ដោយ ម្តាយរបស់ Salman បាននិយាយនៅក្នុងសេចក្តីថ្លែងការណ៍វីដេអូខ្លីមួយថា កូនប្រុសរបស់គាត់ ជាអ្នកញៀនថ្នាំ និងធ្លាប់វាយគាត់ ហើយគាត់បានបណ្តេញគេចេញពីផ្ទះរបស់ពួកគេ ដោយសារតែអាកប្បកិរិយាដ៏ឃោរឃៅរបស់Salman។ ម្តាយបាននិយាយថា ខ្លួនជាអ្នកកាន់សាសនាឥស្លាម ហើយគ្រួសារ មិនទទួលខុសត្រូវចំពោះអំពើខុសឆ្គងណាមួយរបស់ Salman ឡើយ។