ភ្នំពេញ ៖ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក ឲ្យដឹងថា គិតត្រឹមថ្ងៃទី២៤ ខែមិថុនានេះ ព្រលានយន្តហោះអន្តរជាតិតេជោ ក្រុងតាខ្មៅ សម្រេចការសាងសង់បានប្រមាណ ៧៨% ខណៈព្រលានយន្តហោះថ្មីមួយនេះ គ្រោងនឹងដាក់ឲ្យដំណើរការនៅឆមាសទី១ ដើមឆ្នាំ២០២៥ខាងមុខ។ 

​ឯកឧត្តម ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) នៅក្រោយចប់ដំណើរទស្សនកិច្ចរបស់ថ្នាក់ដឹកនាំធនាគារជាតិនៃកម្ពុជា និងធនាគារពាណិជ្ជ បានមានប្រសាសន៍ប្រាប់បណ្តាញអ្នកសារព័ត៌មានឲ្យដឹងដែរ ក្រោយពីបានដើរពិនិត្យវឌ្ឍនភាពនៃដំណើរការសាងសង់ព្រលាយន្តហោះថ្ងៃនេះ កត់សម្គាល់ឃើញថា ការសាងសង់នេះមានលក្ខណៈប្លែកច្រើន និងឃើញថា ជាការសាងសង់មួយក្នុងទំហំធំពុំធ្លាប់មានពីមុនមក។ 

ឯកឧត្តម បានបន្តថា ក្នុងដំណើរទស្សនកិច្ចនាឱកាសនោះ មានធនាគារពាណិជ្ជមួយចំនួន បានបង្ហើបឲ្យដឹងថា ក្នុងចំណោមអ្នក Subscriber (អ្នកជាវ) ប្រហែលជាអាចនឹងបន្ត ហើយក៏នឹងថែមទុនវិនិយោគបន្ថែមទៀត ក្រោយពីបានពិនិត្យដំណើរការសាងសង់ដ៏ល្អប្រសើររបស់គម្រោងព្រលានយន្តហោះនេះ។

សូមបញ្ជាក់ថា ព្រលានយន្តហោះអន្តរជាតិតេជោ ក្រុងតាខ្មៅ មានទីតាំងស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល។ អាកាសយានដ្ឋាននេះ ក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) គឺជាក្រុមហ៊ុនចម្រុះបង្កើតឡើងរួមគ្នាដោយ ក្រុមហ៊ុន OCIC និងរដ្ឋលេខាធិការដ្ឋានអាកាសចរស៊ីវិលកម្ពុជាក្នុងឆ្នាំ២០១៨ ក្រោមការណែនាំរបស់សម្តេចតេជោ ហ៊ុន សែន អតីតនាយករដ្ឋមន្រ្តី និងបច្ចុប្បន្នជាប្រធានព្រឹទ្ធសភា ដើម្បីធ្វើការងារសាងសង់ព្រលានយន្តភ្នំពេញថ្មីមួយនេះ៕

អត្ថបទ ឈិត បូរ៉ាវី