​អារ៉ាប់​រួម៖ ​​ប្រធានាធិបតី​អា​ហ្វ​ហ្គា​នី​ស្ថាន Ashraf Ghani បាន​សន្យា​ថា​នឹង​វិលត្រឡប់​ទៅកាន់​ប្រទេស​របស់​លោក​វិញ ​ដើម្បី​បន្ត​ការ​តស៊ូ​សម្រាប់​សិទ្ធិ និង​តម្លៃ​របស់​ប្រជាពលរដ្ឋ​។ លោក Ghani បាន​ភៀសខ្លួន​ពី​អា​ហ្វ​ហ្គា​នី​ស្ថាន​កាលពី​ថ្ងៃអាទិត្យ​ ខណៈ​ដែល​ពួក​តា​លី​បង់​បាន​វាយ​សម្រុកចូល​ជិត​ដល់​រដ្ឋធានី​កា​ប៊ុល ហើយ​កន្លែង​លាក់ខ្លួន​របស់​លោក​នៅតែ​មិន​ត្រូវ​បាន​គេ​ដឹង ​រហូតដល់​ថ្ងៃ​ពុធ​នៅ​ពេល​ដែល​អារ៉ាប់​រួម​បាន​និយាយ​ថា ខ្លួន​បាន​ទទួលយក​រូបលោក និង​ក្រុម​គ្រួសារ​ដោយ​គិតគូរ​ពី​មនុស្សធម៌។​

​ថ្លែង​ពី​ការ​និរទេស​ខ្លួន​នៅ​អារ៉ាប់​រួម ប្រធានាធិបតី​អា​ហ្វ​ហ្គា​នី​ស្ថាន Ashraf Ghani បាន​និយាយ​ថា ​លោក​បាន​ចាក​ចេញពី​រដ្ឋធានី​កា​ប៊ុល​ដើម្បី​កុំ​ឲ្យ​មានការ​បង្ហូរ​ឈាម​គ្នា ហើយ​បាន​បដិសេធ​របាយការណ៍​ដែល​ថា ​លោក​បាន​យក​ប្រាក់​ចំនួន ១៦៩​​លាន​ដុល្លារ​អាមេរិក​ជាប់​នឹង​ខ្លួន នៅ​ពេល​លោក​ចាក​ចេញពី​វិមាន​ប្រធានាធិបតី ដោយ​និយាយ​ថា ​វា​ជា​ការ​និយាយ​ឡើង​ដោយ​គ្មាន​មូលដ្ឋាន និង​ជា​ការ​កុហក​។​ នៅ​ក្នុង​សេចក្ដីថ្លែងការណ៍​ជា​វីដេអូ​ដំបូង​បន្ទាប់ពី​បង្ហាញមុខ​នៅ​អារ៉ាប់​រួម លោក Ghani បាន​ផ្តល់​ការ​គាំទ្រ​ដល់​កិច្ចចរចា​បន្ត​ដោយ​អតីត​ប្រធានាធិបតី Hamid Karzai និង​អ្នកចរចា​សន្តិភាព​ជាន់​ខ្ពស់ Abdullah Abdullah ជាមួយ​ពួក​តា​លី​បង់​។​

​លោក​ថា ខ្ញុំ​ចង់​ផ្ទេរ​អំណាច​ទៅ​ឱ្យ​​ពួក​តា​លី​បង់​ដោយ​សន្តិវិធី ប៉ុន្តែ​ខ្ញុំ​ត្រូវ​បាន​បណ្ដេញ​ចេញពី​អា​ហ្វ​ហ្គា​នី​ស្ថាន​ដែល​ជា​ការ​ប្រឆាំង​នឹង​ឆន្ទៈ​របស់ខ្ញុំ​។​ “​ខ្ញុំ​ត្រូវ​បាន​គេ​ប្រាប់​ថា​ ពួក​តា​លី​បង់​នៅ​ក្នុង​រដ្ឋធានី​កា​ប៊ុល​…​មាន​កិច្ចព្រមព្រៀង​មួយ​ថា​ តា​លី​បង់​នឹង​មិន​ចូល​រដ្ឋធានី​កា​ប៊ុល​ទេ​។ ប៉ុន្តែ​ពួកគេ​បាន​វាយលុក​ចូល​រួច​ទៅ​ហើយ​។ ខ្ញុំ​មិន​ចង់​ត្រូវ​គេ​ព្យួរ​ក​ទេ ព្រោះ​ក្នុងនាម​ខ្ញុំ​ជា​ប្រធានាធិបតី ខ្ញុំ​ជា​កិត្តិយស​របស់​អា​ហ្វ​ហ្គា​នី​ស្ថាន​។ ខ្ញុំ​មិន​ខ្លាច​ស្លាប់​ទេ​”៕

អត្ថបទ៖ សុខមាន