ស្របពេលភ្លៀងខ្លាំងនៅតែបន្តបង្អុរចុះនៅប្រទេសឈីលី បណ្តាលឲ្យកាត់ផ្តាច់តំបន់ជាច្រើន និងធ្វើឲ្យខូចខាតផ្ទះសម្បែងពលរដ្ឋនោះ សហគមន៍មួយកន្លែង កំពុងប្រឈមនឹងការហៀរទំនប់រ៉ែដែលហូរនាំជាតិដែកកាត់តំបន់សហគមន៍ និងប្រភពផ្គត់ផ្គង់ទឹកនៅជិតនោះ ។

ទីភ្នាក់ងារបរិស្ថានឈីលី SMA និយាយនៅក្នុងសេចក្តីថ្លែងការណ៍ថា ទំនប់របស់ក្រុមហ៊ុនរ៉ែស្ពាន់ Las Cenizas ស្ថិតនៅភាគកណ្តាលប្រទេសឈីលី ចាប់ផ្តើមហៀរកាលពីយប់ថ្ងៃទី ១៣ ខែមិថុនាមកម្ល៉េះ ដោយសារភ្លៀងធ្លាក់ខ្លាំង និងធ្វើឲ្យប្រភពទឹកក្បែរនោះ រួមទាំងទន្លេ La Ligua ស្ថិតក្នុងហានិភ័យនៃផលប៉ះពាល់មិនល្អ ។

លោក Victor Donoso គឺជាអភិបាលក្រុង Cabildo និយាយថា កករពីទំនប់ ហូរកាត់ព្រែក និងផ្ទះសម្បែងប្រជាពលរដ្ឋ ។ នេះគឺជារឿងគួរឲ្យព្រួយបារម្ភខ្លាំងណាស់ដល់សហគមន៍ ។ 

លោកបន្តថា គ្មាននរណាម្នាក់ ចង់រស់នៅក្បែរទំនប់រ៉ែនេះនោះទេ ។

សូមបញ្ជាក់ថា ឈីលីគឺជាប្រទេសផលិតស្ពាន់ធំបំផុតរបស់ពិភពលោក ហើយទីក្រុង Cabildo គឺជាតំបន់កសិកម្ម ហើយប្រជាពលរដ្ឋមានការព្រួយបារម្ភខ្លាំងណាស់ចំពោះផលប៉ះពាល់នៃការហៀរទំនប់រ៉ែ លើការរស់នៅប្រចាំថ្ងៃរបស់ពួកគេ ៕