ការគំរាមកំហែងដែលអាចកើតប្រចំពោះព្រះមហាក្សត្រម៉ាឡេស៊ី Sultan Ibrahim Iskandar និងនាយករដ្ឋមន្ត្រី លោក Anwar Ibrahim ត្រូវបានបំផ្លាញ បន្ទាប់ពីនគរបាលបានចាប់ខ្លួនមនុស្ស ៨នាក់ពីបទសង្ស័យថា មានទំនាក់ទំនងទៅនឹងមនោគមវិជ្ជាជ្រុលនិយម។

នៅឯសន្និសីទសារព័ត៌មាន នាថ្ងៃចន្ទ (ទី២៤ ខែមិថុនា) នេះ រដ្ឋមន្ត្រីក្រសួងមហាផ្ទៃ លោក Saifuddin Nasution Ismail បាននិយាយថា ជនសង្ស័យត្រូវបានចាប់ខ្លួននៅក្នុងប្រតិបត្តិការមួយដែលបានធ្វើឡើងកាលពីចុងសប្តាហ៍។ ជនសង្ស័យដែលមានអាយុពី ២៥ ទៅ ៧០ឆ្នាំ ត្រូវបានចាប់ខ្លួននៅរដ្ឋ Johor, Kelantan, Perak និងរដ្ឋ Selangor។

លោក Saifuddin បានប្រាប់ថា៖ «ការចាប់ខ្លួនបុរសទាំង ៦នាក់ និងស្ត្រី ២នាក់ គឺដោយសារតែការសង្ស័យថា មានទំនាក់ទំនងជាមួយក្រុម ISIS ហើយគឺជាការចាប់ខ្លួនបន្តបន្ទាប់ក្នុងប្រតិបត្តិការពីមុន ដែលធ្វើឡើងនៅថ្ងៃទី១៥ ១៧ និង៣០ ខែឧសភា»។

លោកបានប្រាប់ឲ្យដឹងទៀតថា «ការស៊ើបអង្កេតបឋម ក៏បានបង្ហាញពីវត្តមាននៃការគំរាមកំហែងប្រឆាំងនឹងព្រះអង្គម្ចាស់ នាយករដ្ឋមន្ត្រី បុគ្គលសំខាន់ៗ និងថ្នាក់ដឹកនាំជាន់ខ្ពស់របស់នគរបាល» ដោយបន្ថែមថា វិធានការសុវត្ថិភាពបន្តបន្ទាប់នឹងត្រូវធ្វើឡើងតាមនីតិវិធីប្រតិបត្តិការស្តង់ដារ។

ការស៊ើបអង្កេតកំពុងដំណើរការ ដើម្បីកំណត់ទំនាក់ទំនងរវាងជនសង្ស័យ ប៉ុន្តែលោក Saifuddin បាននិយាយថា ពួកគេទាំងអស់នោះ «មានមនោគមវិជ្ជាដូចគ្នា»៕