ក្រសួងការងារថៃ នៅថ្ងៃចន្ទ (ទី២៤ ខែមិថុនា) នេះ បាននិយាយថា ប្រទេសថៃនឹងបន្តការបញ្ជូនកម្មករផ្នែកកសិកម្មទៅកាន់ប្រទេសអ៊ីស្រាអែល ក្នុងសប្តាហ៍នេះ បន្ទាប់ពីបានផ្អាករយៈពេល ៨ខែ ដោយដាក់គោលដៅឲ្យមានពលរដ្ឋរបស់ខ្លួនច្រើនជាង ១០.០០០នាក់ធ្វើការក្នុងប្រទេសនេះ នៅដំណាច់ឆ្នាំនេះ។

ពលករថៃប្រហែល ៣០.០០០នាក់ បានធ្វើការក្នុងវិស័យកសិកម្ម ដោយបានក្លាយជាក្រុមមួយ ក្នុងចំណោមក្រុមពលករបរទេសដ៏ធំបំផុត នៅក្នុងប្រទេសអ៊ីស្រាអែល មុនពេលជម្លោះបានផ្ទុះឡើងកាលពីខែតុលាឆ្នាំមុន។

បើយោងតាមរដ្ឋាភិបាលថៃ បានឲ្យដឹងថា ដោយបានជាប់នៅក្នុងការប្រយុទ្ធគ្នា នៅពេលដែលខ្មាន់កាំភ្លើងក្រុមហាម៉ាសប៉ាឡេស្ទីន វាយប្រហារអ៊ីស្រាអែល កាលពីថ្ងៃទី៧ ខែតុលា ជនជាតិថៃចំនួន ៣៩នាក់ ត្រូវបានសម្លាប់ និង ៣២នាក់ទៀត ត្រូវបានចាប់ធ្វើជាចំណាប់ថ្នូ។ មនុស្ស ៦នាក់ ក្នុងចំណោមនោះ ត្រូវបានគេជឿថា នៅជាប់ឃុំខ្លួននៅឡើយ។

ក្រសួងការងារបានឲ្យដឹងនៅក្នុងសេចក្តីថ្លែងការណ៍មួយថា៖ «រដ្ឋាភិបាលបានស្នើសុំឲ្យមានការសហការពីរដ្ឋាភិបាលអ៊ីស្រាអែល ដើម្បីឲ្យជួយសង្កត់ធ្ងន់ដល់និយោជក ធ្វើយ៉ាងណាថែរក្សាកម្មករថៃឲ្យមានសុវត្ថិភាព»។

ក្រុមទី១ នៃកម្មករប្រហែល ១០០នាក់ នឹងហោះហើរចេញពីរដ្ឋធានីបាងកក នៅថ្ងៃអង្គារ (ទី២៥ ខែមិថុនា) ស្អែកនេះ បន្ទាប់មកក្រុមផ្សេងទៀត នឹងចេញដំណើរនៅដើមខែកក្កដា៕