រដ្ឋមន្ត្រីមហាផ្ទៃលោក Gerald Darmanin នៅថ្ងៃចន្ទ (ទី២៤ ខែមិថុនា) បាននិយាយថា ប្រទេសបារាំងអាចកើតមាននូវភាពចលាចលស៊ីវិល និងអំពើហិង្សាដែលពាក់ព័ន្ធនឹងការបោះឆ្នោត ខណៈការធ្វើយុទ្ធនាការ ចូលដល់សប្ដាហ៍ចុងក្រោយ មុនការបោះឆ្នោតជុំទី១។

លោក Darmanin បានប្រាប់វិទ្យុ RTL ខ្លីៗថា «វាអាចទៅរួចដែលថា នឹងមានភាពតានតឹងយ៉ាងខ្លាំងក្លា» ដោយលោកបានបន្ថែមថា អាជ្ញាធរកំពុងរៀបចំត្រៀមសម្រាប់ការកើតហេតុការណ៍នោះ។

គួរបញ្ជាក់ថា ប្រធានាធិបតីបារាំង លោក Emmanuel Macron ដែលធ្វើឲ្យប្រទេសជាតិភ្ញាក់ផ្អើលជាមួយនឹងការសម្រេចរំលាយរដ្ឋសភា កាលពីដើមខែនេះ មិនមានវត្តមាននៅលើសន្លឹកឆ្នោតនោះទេ ប៉ុន្តែសម្រាប់អ្នកបោះឆ្នោតជាច្រើន ការបោះឆ្នោតនេះត្រូវបានគេយល់ថា ជាការបោះឆ្នោតប្រជាមតិលើជោគវាសនារបស់ប្រធានាធិបតីដែលធ្លាប់ត្រូវបានគេមើលឃើញថា អាចយកឈ្នះលើការបែកបាក់ផ្នែកនយោបាយ ប៉ុន្តែការវាយតម្លៃគាំទ្ររបស់ពួកគេ បានដួលរលំ បន្ទាប់ពីមានវិបត្តិនយោបាយជាច្រើន៕