​បាល់ទាត់៖ ​ខ្សែ​ការពារ​កណ្តាល​ក្រុម​បិសាច​ក្រហម Manchester United , Phil Jones នៅ​ស្ថិត​ក្នុង​គម្រោង​របស់​អ្នកចាត់ការ Ole Gunnar Solskjaer ដដែល​រដូវ​កាល​នេះ ទោះបី​ជាមួយ​រយៈពេល​ចុងក្រោយ​សម្រាក​រយៈពេល​យូរ​ដោយសាររ​បួស​ក្តី​។

​​តាំងពី​ខែ​មករា​ ឆ្នាំ​២០២០ នៅពេល Manchester United ជួប Tranmere Rovers នៅ FA Cup, Phil Jones បាន​សម្រាក​ព្យាបាល​របួស​តាំងពី​ពេលនោះ​មក និង​ស្ទើរតែ​ធ្វើ​ឱ្យ​អ្នកគាំទ្រ​មួយ​ចំនួន​ភ្លេច​មុខ និង​គិតថា Phil Jones ផ្លាស់ចេញ​បាត់ទៅហើយ​។ ​​កាលពី​ខែកុម្ភៈ ​ឆ្នាំ២០១៩ Phil Jones បាន​ចុះកិច្ចសន្យា​រយៈពេល​វែង ៥ឆ្នាំដែល​នឹង​រក្សា​រូបគេ​ដល់​ឆ្នាំ២០២៣ ខែមិថុនា ដែល​ថែមទាំង​លក្ខខណ្ឌ​បន្ត​បន្ថែម​ទៀតផង​។​ ​​កាលពី​ថ្ងៃ​អង្គារ​កន្លងទៅ Manchester United បាន​ប្រកួត​មិត្តភាព​ជាមួយ Burnley នៅ Old Trafford ហើយ Jones ក៏មាន​វត្តមាន​ផងដែរ​នៅ ៣០នាទីចុងក្រោយ​ដែលជា​វត្តមាន​របស់​កីឡាករ​វ័យ ២៩ឆ្នាំ​រូបនេះ​នៅលើ​ទីលាន​តាំងពី​វះកាត់​កាលពី​ខែមិថុនា​ ឆ្នាំ២០២០​។

​​បន្ទាប់​ពីនេះ Phil Jones នឹងត្រូវ​លេង​ឱ្យ​ក្រុម​អាយុ​ក្រោម ២៣ឆ្នាំ​ប៉ុន្មាន​សប្តាហ៍​សិន​មុននឹង​កាយសម្បទា​រឹងមាំ​អាច​ឡើងមក​ក្រុម​ធំ​បាន​។ ​​Phil Jones នៅតែ​ស្ថិតក្នុង​គម្រោង​របស់ Ole Gunnar Solskjaer ដដែល ដែល​មានន័យថា Manchester United នៅពេលនេះ​មាន​ខ្សែការ​ពារ​កណ្តាល ៥​នាក់​រួមមាន Harry Maguire, Victor Lindelof, Eric Bailey, Phil Jones និង​កីឡាករ​ចំនូល​ថ្មី Raphael Varane ដែល​ផ្ទេរ​ពី Real Madrid តម្លៃ ៣៤លាន​ផោន​៕

​អត្ថបទ​៖​នាង សុភា​វុ​ធ