ទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ ត្រូវបានប្រជាជនអ៊ីស្រាអែលរាប់សិបនាក់ប្តឹង កាលពីថ្ងៃចន្ទ ដែលបានចោទប្រកាន់ថា ទីភ្នាក់ងារនេះ បានផ្តល់ជំនួយ និងគាំទ្រ ការវាយប្រហាររបស់ក្រុមហាម៉ាស កាលពីថ្ងៃទី ៧ ខែតុលា លើប្រទេសអ៊ីស្រាអែល។

នៅក្នុងពាក្យបណ្ដឹង ដែលដាក់ទៅកាន់តុលាការស្រុករបស់សហរដ្ឋអាមេរិកក្នុងទីក្រុង Manhattan ដើមបណ្តឹង បាននិយាយថា ទីភ្នាក់ងារផ្តល់ជំនួយ និងការងារសម្រាប់ជនភៀសខ្លួនប៉ាឡេស្ទីន របស់អង្គការសហប្រជាជាតិ នៅតំបន់ដើមបូព៌ា (UNRWA) បានចំណាយពេលជាងមួយទសវត្សរ៍ ជួយដល់ក្រុមហាម៉ាស កសាងនូវអ្វីដែលគេហៅថា «ហេដ្ឋារចនាសម្ព័ន្ធភេរវកម្ម» និងកងកម្លាំងដែលត្រូវការសម្រាប់ការវាយប្រហារ។

ដើមបណ្តឹង កំពុងស្វែងរកការខូចខាតដែលមិនជាក់លាក់ សម្រាប់អ្វីដែលពួកគេចោទប្រកាន់ថា ជា ការផ្តល់ជំនួយ និងគាំទ្រដល់អំពើប្រល័យពូជសាសន៍ ឧក្រិដ្ឋកម្ម និងការធ្វើទារុណកម្ម របស់ក្រុមហាម៉ា ប្រឆាំងមនុស្សជាតិ របស់ទីភ្នាក់ងារ UNRWA ដែលពួកគេបាននិយាយថា បំពានច្បាប់អន្តរជាតិ និងច្បាប់ការពារជនរងគ្រោះ។

ទីភ្នាក់ងារ UNRWA បានបដិសេធមិនធ្វើអត្ថាធិប្បាយ ហើយទីភ្នាក់ងារនេះ បាននិយាយថាខ្លួនទទួលយកការចោទប្រកាន់ពីបទប្រព្រឹត្តខុសរបស់បុគ្គលិកយ៉ាងធ្ងន់ធ្ងរ ហើយបានបញ្ឈប់បុគ្គលិកចំនួន១០ នាក់ ដែលត្រូវបានចោទប្រកាន់ដោយអ៊ីស្រាអែលថា មានជាប់ពាក់ព័ន្ធក្នុងការវាយប្រហារនេះ។

អគ្គស្នងការរបស់ទីភ្នាក់ងារ UNRWA លោក ហ្វីលីព ឡាហ្សារីនី(Philippe Lazzarini) និងមន្ត្រីទីភ្នាក់ងារបច្ចុប្បន្ន និងអតីតមួយចំនួន ក៏ជាជនជាប់ចោទផងដែរ។

ដើមបណ្តឹង រួមមានមនុស្ស ១០១ នាក់ ដែលបានរួចជីវិត ពីការវាយប្រហារ ឬមានសាច់ញាតិដែលត្រូវបានសម្លាប់។