ប្រធានាធិបតីអាមេរិក លោក ចូ បៃដិន (Joe Biden) កំពុងឆ្ពោះទៅរកការជជែកដេញដោលដ៏សំខាន់ជាមួយគូប្រជែងរបស់ខ្លួនគឺលោក ដូណាល់ ត្រាំ (Donald Trump) នៅសប្តាហ៍នេះ ដោយនាំយកគោលនយោបាយអន្តោប្រវេសន៍ និងព្រំដែនថ្មី ដែលអ្នកគាំទ្រសង្ឃឹមថានឹងបង្កើនជំហររបស់លោកក្នុងចំណោមអ្នកបោះឆ្នោតដែលមានចិត្តសង្ស័យ។

លោក បៃដិន បានប្រកាសពីគោលនយោបាយសំខាន់ៗចំនួនពីរនៅក្នុងខែមិថុនា ដែលស្វះស្វែងរកការដោះស្រាយបញ្ហាប្រឈមនៃការធ្វើអន្តោប្រវេសន៍ និងទាក់ទាញអ្នកបោះឆ្នោត រួមមានការហាមឃាត់សិទ្ធិជ្រកកោនដើម្បីកាត់បន្ថយការឆ្លងដែនខុសច្បាប់នៅព្រំដែនអាមេរិក-ម៉ិកស៊ិក និងផ្ដល់ភាពស្របច្បាប់សម្រាប់អ្នករស់នៅយូរអង្វែងដែលរៀបការជាមួយពលរដ្ឋអាមេរិក។

គោលនយោបាយទាំងពីរ ដែលទីមួយមានគោលបំណងបដិសេធមិនទទួលជនអន្តោរប្រវេសន៍ថ្មី និងមួយទៀតផ្តោតលើការផ្ដល់ភាពស្របច្បាប់មនុស្សរាប់រយពាន់នាក់ដែលមកដល់រួចហើយនោះ បង្ហាញពីភាពតឹងតែងផ្នែកនយោបាយដែលលោក បៃដិន បានជួបប្រទះនៅពេលលោកប្រកួតប្រជែងសម្រាប់អាណត្តិថ្មីក្នុងតំណែងសេតវិមាន។

ចំនួនជនអន្តោរប្រវេសន៍ត្រូវបានចាប់ខ្លួនដោយខុសច្បាប់ឆ្លងកាត់ព្រំដែនអាមេរិក-ម៉ិកស៊ិក ក្នុងពេលលោក បៃដិន កាន់តំណែងជាប្រធានាធិបតី និងការធ្វើអន្តោប្រវេសន៍ បានលេចចេញជាក្តីកង្វល់ចម្បងរបស់ប្រជាជននៅមុនការបោះឆ្នោតថ្ងៃទី០៥ ខែវិច្ឆិកា។

នៅលើគោលនយោបាយអន្តោប្រវេសន៍ អ្នកចុះឈ្មោះបោះឆ្នោត បានគាំទ្រលោក ត្រាំ លើសលោក បៃដិន ដោយតួលេខ ១៧ ភាគរយ នេះបើយោងតាមការស្ទង់មតិរបស់សារព័ត៌មាន រ៉យទ័រ និងស្ថាប័នស្រាវជ្រាវ អ៊ីបសូស (Reuters/Ipsos) នៅពាក់កណ្តាលខែឧសភា។ បញ្ហានេះប្រាកដជាប្រធានបទក្ដៅនៅពេលបេក្ខជនទាំងពីរប្រឈមមុខនឹងការជជែកដេញដោលគ្នានៅថ្ងៃព្រហស្បតិ៍ (២៧ មិថុនា) សប្តាហ៍នេះក្នុងទីក្រុង អាត្លង់តា (Atlanta)៕