គ្រឹះស្ថានសិក្សារដ្ឋមួយចំនួន ក្នុងបរិបទថ្មីនៃវិស័យអប់រំនេះ បានបោះជំហានទៅមុខ ដោយ​ផ្លាស់​ប្ដូរ ពីការសិក្សាជាទម្លាប់តែមួយវេន ទៅសិក្សាបែបថ្មីពេញមួយថ្ងៃ។ ការចាប់ផ្ដើមនេះ កំពុង​អនុវត្ត​នៅ​សាលា​រៀនរដ្ឋមួយចំនួន ដែលមានភូមិសាស្ត្រនៅរាជធានីភ្នំពេញ ក៏ដូចជាសាលា​មួយ​ចំនួន​នៅ​តាម​បណ្ដាខេត្តដោយអនុវត្តការបង្រៀន និងរៀនពេញមួយថ្ងៃ រយៈពេល ៨ម៉ោង។

អ្នកគ្រូ ហុក សាត នាយិកា បឋមសិក្សាព្រៃស្ពឺ លើកឡើងថា ការសិក្សាពេញមួយថ្ងៃនេះ បច្ចុប្បន្ន​សម្រាប់​ភូមិសាស្ត្ររាជធានីភ្នំពេញ គឺសាលាបឋមសិក្សាចំនួន ៩ទីតាំងកំពុងចាប់​ផ្ដើម​អនុវត្ត​ផង​ដែរ​។ ការចាប់ផ្ដើមក្នុងដំណាក់កាលដំបូងនេះ សាលាភាគច្រើនពុំទាន់អាចអនុវត្តពេញលេញ បាន​គ្រប់ថ្នាក់រៀននោះទេ។ សម្រាប់សាលាបឋមសិក្សា ព្រៃស្ពឺ ក្នុងភូមិសាស្ត្រខណ្ឌ ពោធិ៍សែនជ័យ ក្នុងឆ្នាំសិក្សា ២០២៣-២០២៤នេះ ក៏បានចាប់ផ្ដើម​ការ​បង្រៀន​ពេញ​មួយ​ថ្ងៃ​ផង​ដែរ។ ការចាប់ផ្ដើមដំបូង គឺអនុវត្តបានសម្រាប់សិស្ស ២ថ្នាក់ គឺសិស្សថ្នាក់ទី ៤ និងសិស្សថ្នាក់ទី ៥ ដែលមានសិស្សសរុបប្រមាណជិត ១០០នាក់។

អ្នកគ្រូនាយិកាបន្តថាការចាប់ផ្ដើមដំបូងនេះ មានការគាំទ្រពីអាណាព្យាបាលសិស្ស ក្នុងការ​បង់​បដិភាគ​ជាថវិកា ៥ម៉ឺនរៀល ជាប្រចាំខែ។ ថវិកានេះ គឺដើម្បីគាំទ្រផ្ដល់ជូនគ្រូបង្រៀន ក៏ដូចជា​ទិញ​សម្ភារ​បន្ថែមសម្រាប់បម្រើដល់ការរៀននិងបង្រៀន។ ការសិក្សាថែមមួយវេននេះ ផ្តោត​លើ​មុខ​វិជ្ជាខ្មែរ គណិតវិទ្យា ភាសាអង់គ្លេស និងកំព្យូទ័រផងដែរ។ ជាគោលដៅទៅមុខ សាលា​នឹង​ពង្រីក​ការ​សិក្សា​ពេញមួយថ្ងៃ សម្រាប់សិស្សថ្នាក់ផ្សេងទៀត។

ចំពោះការសិក្សាពេញមួយថ្ងៃនេះ សម្រាប់សិស្ស ក៏សប្បាយចិត្ត នឹងការសិក្សាផងដែរ។ ពួក​គេ​សប្បាយ​ចិត្ត ដោយបានរៀនកាន់តែច្រើន ពិសេសបានរៀនកំព្យូទ័រ និងភាសាអង់គ្លេសបន្ថែម។ ពួក​គេ​កត់សម្គាល់ដែរថា រយៈពេលប៉ុន្មានខែ ដែលបានរៀនពេញមួយថ្ងៃនេះ គឺពួកគេ​ចេះ​ដឹង​ច្រើន​ជាង​មុន។

ការចាប់ផ្ដើមសិក្សាពេញមួយថ្ងៃនេះ សម្រាប់អ្នកគ្រូ សុទ្ធ ធីតា ជាគ្រូទទួលបន្ទុក​ការ​បង្រៀន​ពេញ​មួយ​ថ្ងៃ ក៏បានមើលឃើញពីការអភិវឌ្ឍន៍របស់សិស្សផងដែរ។ អ្នកគ្រូមើល​ឃើញ​ពី​លទ្ធផល​សិស្ស​មាន​ភាព​ប្រសើរច្រើនជាងមុន ពិសេស ចាប់ផ្ដើមស្វែងយល់ពីបច្ចេកវិទ្យាកំព្យូទ័រ ក៏ដូចជា​ភាសា​អង់គ្លេស​។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា នាពេលកន្លងមកនេះ បាន​បញ្ជាក់​ដែរ​ថា បច្ចុប្បន្ន នៅទូទាំងប្រទេស គឺសាលារៀនចំនួន ២០ កំពុងសាក​ល្បង​ដំណើរ​ការ​ការ​សិក្សាពេញមួយថ្ងៃ៕ អត្ថបទ៖ គឹមហុក