អ្នកលេងយុទ្ធគុនចម្រុះជួរមុខកម្ពុជា ចាន់ រតនា បានសម្ដែងការសប្បាយចិត្តជាខ្លាំង ដែលត្រូវបានជ្រើសរើសចូលរួមប្រកួតកីឡាយុទ្ធគុនចម្រុះជើងឯកអាស៊ី លើកទី២ (2^nd AMMA Championship) ឆ្នាំ២០២៤ ដែលកម្ពុជាធ្វើម្ចាស់ផ្ទះ នាថ្ងៃទី១១ ដល់ថ្ងៃទី១៣ ខែកក្កដាខាងមុខ ដ្បិតនេះជាលើកដំបូងហើយ ដែលលោកត្រូវប្រកួតគុនចម្រុះលក្ខណៈកីឡា តំណាងប្រទេសកម្ពុជា ដែលទាមទារឲ្យលោកត្រូវផ្ដោតការយកចិត្តទុកដាក់លើច្បាប់ នៃបទបញ្ជាការប្រកួត ច្រើងជាគូប្រកួតដែលត្រូវជួបលើសង្វៀន ។

ក្នុងឱកាសសន្និសីទសារព័ត៌មាន ស្ដីពីការប្រកួតយុទ្ធគុនចម្រុះជើងឯកអាស៊ី កាលពីថ្មីៗ ចាន់ រតនា បានបញ្ជាក់ថា ខ្លួនមិនទាន់ដឹងថា អាចធ្វើបានដល់កម្រិតណាទេ តែនឹងព្យាយាមឲ្យអស់ពីសមត្ថភាព ដើម្បីដណ្ដើមមេដាយជូនជាតិ ។ ការលើកឡើងនេះ ព្រោះនេះជាការប្រកួតលក្ខណៈកីឡា ផ្ទុយពីការប្រកួតរាល់ដង ដែលប្រកួតគុនចម្រុះលក្ខណៈអាជីព ។ ដូច្នេះខ្លួនបានផ្ដោតសំខាន់លើច្បាប់ប្រកួត ជាជាងផ្ដោតលើដៃគូប្រកួត ព្រោះរាល់អត្តពលិកចូលរួម សុទ្ធតែជាកីឡាករឆ្នើមៗតំណាងប្រទេសរៀងខ្លួន ។

ចាន់ រតនា បន្ដថា ការប្រកួតគុនចម្រុះលក្ខណៈកីឡា អាចងាយស្រួលជាងប្រកួតលក្ខណៈអាជីព ព្រោះមានការការពារច្រើន ដើម្បីកុំឲ្យមានគ្រោះថ្នាក់ធ្ងន់ធ្ងរ ។ ដូច្នេះការប្រកួតយុទ្ធគុនចម្រុះជើងឯកអាស៊ី នាខែក្រោយ លោកនឹងផ្ដោតលើកម្លាំង និងល្បឿនឲ្យបានល្អ ដើម្បីប្រជែងជាមួយអត្តពលមកពីបណ្ដាប្រទេសផ្សេងៗ ឆ្ពោះទៅទទួលបានលទ្ធផលល្អជូនជាតិ ។ បន្ថែមលើនេះ ក្នុងនាមម្ចាស់ផ្ទះ រតនា ក៏បានអំពាវនាវឲ្យប្រជាពលរដ្ឋចូលរួមទស្សនា និងលើកទឹកចិត្តដល់អត្តពលិកជាតិឲ្យបានច្រើនកុះករផងដែរ ។

គួរដឹងថា ព្រឹត្តិការណ៍ដ៏អស្ចារ្យ នៃការប្រកួតយុទ្ធគុនចម្រុះជើងឯកអាស៊ី លើកទី២ នៅកម្ពុជា នឹងរៀបចំនៅវិមានពហុកីឡដ្ឋានជាតិអូឡាំពិក ដោយពិធីបើកផ្លូវការ នាថ្ងៃទី១១ ខែកក្កដា នឹងមានការអញ្ជើញជាអធិបតីភាពដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ។ សម្រាប់ការប្រកួតរយៈពេល ៣ថ្ងៃ ត្រូវបានរំពឹងនឹងមានអត្តពលិកយ៉ាងហោច ២០ប្រទេសចូលរួម ។

សម្រាប់កម្ពុជា បានត្រៀមអត្តពលិក ១៦រូប ដើម្បីទទួលស្វាគមន៍អ្នកលេងគុនចម្រុះមកពីបណ្ដាប្រទេសផ្សេងៗក្នុងទ្វីបអាស៊ី រួមមានកីឡាករ ផេង សុបញ្ញា, ឡុង ឡា, រិន សារ័ត្ន, ហ៊ុន គឹមហៀង, មាស ម៉ើ, សែន ច័ន្ទរិទ្ធីគុណ (Thiago), ហ៊ុន ចន្ទរាជ, ចាន់ សំអាត, ចាន់ រតនា, អេ វីរៈខាំឈីតភូថង, ហាត ភី, កីឡាការិនី ខៀវ ចិន្ដារ័ត្ន, នៅ ស្រីពៅ, គន្ធ វ៉ាន់នីតា, អ៊ុំ ថារ័ត្ន និងកីឡាការិនី ទួន ស្រីភីន ៕

អត្ថបទ លី ឈុនឡា