ថ្នាក់ដឹកនាំ និងកីឡាករមិត្តរួមក្រុម នៃក្លិបបាល់ទាត់ណាហ្គាវើលដ៏ បានសម្ដែងការសោកស្ដាយ ចំពោះសមត្ថភាពកីឡាករ ស៊ូ យ៉ាទី បន្ទាប់ពីអ្នកចាំទីមានបទពិសោធន៍ជោគជ័យ ទាំងលើឆាកជាតិ និងអន្ដរជាតិរូបនេះ បានសម្រេចសម្រាកពីបាល់ទាត់មួយរយៈធំ ដោយសារបញ្ហារបួស និងភារកិច្ចផ្ទាល់ខ្លួន ។ យ៉ាងណាមិញ ថ្នាក់ដឹកនាំក្លិប បានគោរពតាមការស្នើសុំនេះ ហើយចាត់ទុក យ៉ាទី នៅតែជាគំរូមួយ សម្រាប់សិស្សប្អូនអនុវត្តតាម ។

ក្នុងជំនួបលាមិត្តរួមក្រុម ដែលត្រូវបានក្លិបផ្សព្វផ្សាយ នៅថ្ងៃទី២៤ ខែមិថុនា ក្នុងនាមគ្រូបង្វឹក លោក ឃឹម បូរី បានថ្លែងអំណរគុណកីឡាកររួមជំនាន់ ស៊ូ យ៉ាទី ដែលបានខិតខំប្រឹងប្រែងជួយក្លិបរយៈពេល ៦រដូវកាលកន្លងមក ។ លោកបានចាត់ទុក យ៉ាទី គឺជាអ្នកចាំទីដ៏ល្អម្នាក់នៅកម្ពុជា ។ តែយ៉ាងណាក្លិបបានគោរពតាមការសម្រេចចិត្តនេះ និងបានជូនពរឲ្យគេទទួលបានជោគជ័យនាថ្ងៃអនាគតទៀតផង ។

ចំណែកលោក យ៉ា ប៉ោទ្រី អ្នកចាត់ការទូទៅក្លិប បានគូសបញ្ជាក់ថា ទោះបី យ៉ាទី បានសម្រាកពីអាជីពបាល់ទាត់ តែសមិទ្ធផល និងការខិតខំប្រឹប្រែងជួយក្លិបកន្លងមក បានក្លាយជាគំរូសម្រាប់សិស្សប្អូនជំនាន់ក្រោយ គួររៀនសូត្រ និងអនុវត្ត ដើម្បីទទួលបានសមិទ្ធផលល្អប្រសើរសម្រាប់ខ្លួនឯងផង ក៏ដូចជារួមចំណែកជួយក្លិបផង ពិសេសសម្រាប់ការត្រៀមខ្លួនប្រកួតប្រជែង នារដូវកាលថ្មីឆ្នាំ២០២៤/២៥ ខាងមុខ ។

ទន្ទឹមជាមួយគ្នា អតីតអ្នកចាំទីក្រុមជម្រើសជាតិកម្ពុជា ស៊ូ យ៉ាទី ក៏បានថ្លែងអំណរគុណថ្នាក់ដឹកនាំក្លិបណាហ្គាវើលដ៏ ដែលបានអនុញ្ញាតឲ្យខ្លួនសម្រាក តាមសំណូមពររបស់ខ្លួន ក្នុងការរំសាយកុងត្រាសេសសល់ទាំងអស់ ។ យ៉ាទី បញ្ជាក់ថា វាពិតជាការសម្រេចចិត្តដ៏ពិបាកបំផុត សម្រាប់ខ្លួន ដោយសារតែមូលហេតុ គេចង់សម្រាកពីបាល់ទាត់មួយរយៈធំ ដើម្បីព្យាបាលរបួសឲ្យជាសះស្បើយ ១០០% និងជាប់ភារកិច្ចផ្ទាល់ខ្លួន ។

គួរដឹងថា ស៊ូ យ៉ាទី បានប្រឡូកអាជីពបាល់ទាត់ ដោយផ្ដើមអាជីបដំបូង ជាមួយអតីតក្លិបបៀលប្រាយយូណាយធីត ចន្លោះឆ្នាំ២០០៦-២០០៧, ក្រសួងការពារជាតិ(បច្ចុប្បន្ន Tiffy Army FC) ឆ្នាំ២០០៩-២០១៣, ក្លិបភ្នំពេញក្រោន ចន្លោះឆ្នាំ២០១៣-២០១៥, ក្លិបបឹងកេត ចន្លោះឆ្នាំ២០១៥-២០១៨ និងក្លិបណាហ្គាវើលដ៏ ពីឆ្នាំ២០១៨ រហូតដល់បច្ចុប្បន្ន ។ ក្រៅពីក្លិបអាជីព យ៉ាទី ក៏ជាផ្នែកមួយដ៏សំខាន់ នៃក្រុមជម្រើសជាតិកម្ពុជា ក្នុងរយៈពេលប្រមាណ ១៥ឆ្នាំចុងក្រោយ ។ រយៈពេលជិត ២ទសវត្សរ៍កន្លងមកនេះ យ៉ាទី បានបន្សល់នូវស្នាដៃជាច្រើន ទាំងក្របខណ្ឌថ្នាក់ជាតិ និងអន្ដរជាតិ ៕

អត្ថបទ លី ឈុនឡា