ប្រធានាធិបតីកូរ៉េខាងត្បូង លោក Yoon Suk Yeol នៅថ្ងៃអង្គារនេះ បានរិះគន់ការបញ្ជូនបាឡុងដែលផ្ទុក  កាកសំណល់របស់ប្រទេសកូរ៉េខាងជើង ទៅកាន់កូរ៉េខាងត្បូង និងកិច្ចសហប្រតិបត្តិការយោធា ជាមួយរុស្ស៊ីថា ជាទង្វើ «ហួសសម័យ» ដែលប្រឆាំងនឹងការរីកចម្រើន ក្នុងប្រវត្តិសាស្ត្រ។

លោក Yoon បានធ្វើការកត់សម្គាល់នៅក្នុងសុន្ទរកថាមួយ ដើម្បីរំលឹកខួបលើកទី៧៤នៃការផ្ទុះឡើង       សង្គ្រាមកូរ៉េឆ្នាំ ១៩៥០-៥៣ ដោយនិយាយថា សន្ធិសញ្ញាភាពជាដៃគូយុទ្ធសាស្ត្រគ្រប់ជ្រុងជ្រោយរវាង    កូរ៉េខាងជើង និងរុស្ស៊ី បានរំលោភបំពានយ៉ាងច្បាស់លើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

លោក Yoon បាននិយាយនៅក្នុងសុន្ទរកថាក្នុងអំឡុងពេលពិធីមួយនៅទីក្រុង Daegu ភាគអាគ្នេយ៍ថា៖    «នាពេលថ្មីៗនេះ ប្រទេសកូរ៉េខាងជើង មិនស្ទាក់ស្ទើរក្នុងការអនុវត្តការញុះញង់គួរឲ្យស្អប់ខ្ពើម និង         មិនសមហេតុផល ក្នុងការបញ្ជូនបាឡុងដែលផ្ទុកកាកសំណល់ទាំងនោះ មកកាន់កូរ៉េខាងត្បូង។ កាលពីសប្តាហ៍មុន ប្រទេសនេះ បានចុះហត្ថលេខាលើសន្ធិសញ្ញាសហប្រតិបត្តិការយុទ្ធសាស្ត្រដ៏ទូលំទូលាយជាមួយរុស្ស៊ី ដែលបានចាប់ផ្តើមសង្រ្គាមនៅអ៊ុយក្រែន ហើយបានសន្យាថា នឹងពង្រឹងកិច្ចសហប្រតិបត្តិការយោធា និងសេដ្ឋកិច្ច ជាការរំលោភបំពានយ៉ាងច្បាស់លើសេចក្តីសម្រេចរបស់ក្រុមប្រឹក្សាសន្តិសុខUN»។

លោក បានបន្តថា៖«ទាំងនេះ គឺគ្មានអ្វីក្រៅពីទង្វើហួសសម័យដែលប្រឆាំងនឹងការរីកចម្រើន ក្នុងប្រវត្តិសាស្ត្រនោះទេ។ «យោធារបស់យើង នឹងរក្សាការត្រៀមខ្លួនយ៉ាងខ្ជាប់ខ្ជួន ដើម្បីធានាថា កូរ៉េខាងជើងមិនហ៊ានប្រឈមមុខជាមួយកូរ៉េខាងត្បូង ក្នុងកាលៈទេសៈណាក៏ដោយ ហើយនឹងឆ្លើយតបយ៉ាងលើសលប់ និងដាច់ខាតចំពោះការបង្កហេតុណាមួយ ពីកូរ៉េខាងជើង»។