មន្ត្រីអាមេរិកពីររូប បាននិយាយថា សហរដ្ឋអាមេរិក ត្រូវបានគេរំពឹងថា នឹងប្រកាសនៅថ្ងៃអង្គារនេះថា ខ្លួនកំពុងបញ្ជូនអាវុធមានតម្លៃ ១៥០លានដុល្លារបន្ថែមទៀត ទៅឲ្យប្រទេសអ៊ុយក្រែន ខណៈដែលរុស្ស៊ីបានចោទប្រកាន់អ៊ុយក្រែនថា បានប្រើប្រាស់អាវុធដែលផ្តល់ដោយសហរដ្ឋអាមេរិក ដើម្បីវាយប្រហារនៅខាងក្នុងប្រទេសរុស្ស៊ី ឬទឹកដីដែលគ្រប់គ្រងដោយរុស្ស៊ី ។

កាលពីថ្ងៃចន្ទ រុស្ស៊ីបានកោះហៅឯកអគ្គរដ្ឋទូតអាមេរិក ដើម្បីតវ៉ានឹងអ្វីដែលខ្លួននិយាយថា ជាការប្រើប្រាស់មីស៊ីលកម្រិតខ្ពស់ដែលផលិតដោយសហរដ្ឋអាមេរិក ក្នុងការវាយប្រហាររបស់អ៊ុយក្រែន លើតំបន់គ្រីម៉េ កាលពីថ្ងៃអាទិត្យ ដែលត្រូវគេបានរាយការណ៍ថា បានសម្លាប់មនុស្ស ៤នាក់ និង ជាង១៥០នាក់ រង     របួស។

តំបន់គ្រីម៉េ ដែលរុស្ស៊ីបានដណ្តើមយកពីអ៊ុយក្រែនក្នុងឆ្នាំ ២០១៤ ជាទង្វើមួយដែលពិភពលោកភាគច្រើន បានចាត់ទុកថា ខុសច្បាប់នោះ ត្រូវបានប្រកាសជាគោលដៅត្រឹមត្រូវសម្រាប់អ៊ុយក្រែន ដោយសម្ព័ន្ធមិត្តលោកខាងលិច ជាយូរមកហើយ។

ទោះបីជាយ៉ាងណាក៏ដោយ មន្ទីរបញ្ចកោណ បាននិយាយកាលពីសប្តាហ៍មុនថា ពេលនេះ យោធាអ៊ុយ  ក្រែន ក៏ត្រូវបានអនុញ្ញាតឲ្យប្រើប្រាស់មីស៊ីលរយៈចម្ងាយឆ្ងាយដែលផ្តល់ដោយសហរដ្ឋអាមេរិក ដើម្បីវាយប្រហារគោលដៅនានា នៅក្នុងប្រទេសរុស្ស៊ី ប្រសិនបើខ្លួនកំពុងធ្វើសកម្មភាពការពារខ្លួន។ ចាប់តាំងពីការចាប់ផ្តើមនៃសង្រ្គាមមក សហរដ្ឋអាមេរិក បានរក្សាគោលនយោបាយមិនអនុញ្ញាតឲ្យអ៊ុយក្រែនប្រើប្រាស់អាវុធដែលខ្លួនផ្តល់ឲ្យ ដើម្បីវាយប្រហារគោលដៅនៅលើទឹកដីរុស្ស៊ី ដោយសារតែខ្លាចជម្លោះនេះ កាន់តែ ខ្លាំងឡើង។