ការិយាល័យអង្គការសហប្រជាជាតិ សម្រាប់ការសម្របសម្រួលកិច្ចការមនុស្សធម៌ (OCHA) កាលពីថ្ងៃចន្ទ បាននិយាយថា ប្រទេសស៊ូដង់ នៅតែបន្តឈានទៅរកភាពវឹកវរ ដោយវិបត្តិមនុស្សធម៌កាន់តែធ្ងន់ធ្ងរទៅៗ។

អង្គការ OCHA បាននិយាយនៅក្នុងការធ្វើបច្ចុប្បន្នភាពរបស់ខ្លួន កាលពីថ្ងៃចន្ទថា ជីវិតរបស់មនុស្ស ៨០០.០០០នាក់ មានស្ត្រី កុមារ បុរស ចាស់ជរា និងជនពិការ កំពុងស្ថិតក្នុងគ្រោះថ្នាក់ ខណៈដែលការទម្លាក់គ្រាប់បែក និងការបាញ់ផ្លោង នៅតែបន្តនៅក្នុងតំបន់ដែលមានប្រជាជនរស់នៅច្រើន បង្កឱ្យមានគ្រោះថ្នាក់រយៈពេលយូរ និងរាលដាលដល់ជនស៊ីវិល ព្រមទាំងបង្អាក់យ៉ាងខ្លាំងដល់ការផ្តល់សេវាសំខាន់ៗដែលប្រជាជនពឹងផ្អែកលើ។

ក្នុងរយៈពេលបីខែកន្លងទៅនេះ អង្គការបានកត់សម្គាល់ថា មនុស្សរហូតដល់ ១៤៣.០០០នាក់ប្រហែលជាត្រូវបានជម្លៀសខ្លួនពីទីក្រុង Al Fasher ជារដ្ឋធានី នៃរដ្ឋ North Darfur ប្រទេសស៊ូដង់ ដោយសារតែការប៉ះទង្គិចគ្នា រវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័ស យោធាប៉ារ៉ា (RSF) ។ យោងតាមលោក អ៊ីប្រាហ៊ីម អាប់ឌុលឡា ខាទី (Ibrahim Abdullah Khatir) អគ្គនាយកនៃក្រសួងសុខាភិបាលនៃរដ្ឋ North Darfur បានឱ្យដឹងថា ការប្រយុទ្ធគ្នាកាន់តែខ្លាំងនៅក្នុង និងជុំវិញទីក្រុង Al Fasher បានឆក់យកជីវិតមនុស្សជាង៣០០នាក់ ។

យោងតាមការប៉ាន់ស្មានថ្មី ដោយអង្គការ OCHA បានឲ្យដឹងថា ប្រទេសស៊ូដង់ បាននិងកំពុងមើលឃើញការប៉ះទង្គិចគ្នាយ៉ាងបង្ហូរឈាមរវាងកងកម្លាំងប្រដាប់អាវុធស៊ូដង់(SAF) និងកងកម្លាំងគាំទ្ររហ័ស(RSF) ចាប់តាំងពីថ្ងៃទី១៥ ខែមេសា ឆ្នាំ២០២៣។ រហូតមកដល់ពេលនេះ ជម្លោះបានឆក់យកជីវិតមនុស្សជាង ១៥.៥៥០នាក់ និងបានជម្លៀសប្រជាជនជាង ៨,៨ លាននាក់នៅទូទាំងប្រទេស។