បើយោងតាមការសិក្សា បានឲ្យដឹងថា ឆ្នាំ២០២៣ ដែលជាឆ្នាំមានអាកាសធាតុក្តៅបំផុតក្នុងកំណត់ត្រានោះ ក៏ជាឆ្នាំដែលចំហេះព្រៃមានសកម្មភាពខ្លាំងក្លាបំផុតដែរ។ ការស្រាវជ្រាវបានរកឃើញថា ទាំងភាពញឹកញាប់ និងការកើនឡើងនៃចំហេះព្រៃដ៏ខ្លាំងក្លា មានកម្រិតច្រើនជាង ២ដង ក្នុងរយៈពេល ២ទសវត្សរ៍កន្លងមកនេះ។ ហើយនៅពេលដែលផលវិបាកផ្នែកអេកូឡូស៊ី សង្គម និងសេដ្ឋកិច្ច ដោយសារចំហេះព្រៃ ត្រូវបានរាប់បញ្ចូលនោះ ៦ឆ្នាំ ក្នុងចំណោម ៧ឆ្នាំចុងក្រោយនេះ គឺមាន «សភាពខ្លាំងក្លាបំផុត»។

អ្នកស្រាវជ្រាវថ្នាក់ក្រោយបណ្ឌិតផ្នែកចំហេះព្រៃនៃសាកលវិទ្យាល័យ Tasmania និងជាអ្នកដឹកនាំការស្រាវជ្រាវដែលបានចេញផ្សាយនៅថ្ងៃទី២៤ ខែមិថុនា គឺលោក Calum Cunningham បាននិយាយថា៖ «ការណ៍ដែលយើងបានរកឃើញការកើនឡើងដ៏ធំក្នុងរយៈពេលដ៏ខ្លីបែបនេះ ធ្វើឲ្យការរកឃើញកាន់តែផ្ដល់ភាពភ្ញាក់ផ្អើលខ្លាំងឡើងៗ។ យើងកំពុងឃើញការបង្ហាញកាន់តែច្បាស់នូវអាកាសធាតុក្តៅ និងហួតហេង ដោយភ្នែករបស់យើងផ្ទាល់ តាមរយៈចំហេះព្រៃដ៏ខ្លាំងក្លាទាំងនេះ»។

គួរបញ្ជាក់ថា កាលពីសប្តាហ៍មុន ចំហេះព្រៃក្នុងរដ្ឋ New Mexico របស់សហរដ្ឋអាមេរិក បានបណ្ដាលឲ្យមនុស្ស ២នាក់ស្លាប់ និងបានឆាបឆេះផ្ទៃជិត ១០.០០០ហិកតា ហើយនៅរដ្ឋកាលីហ្វ័រញ៉ាភាគខាងត្បូង ផ្ទៃដីជាង ជាង ៥.៦៦៥ហិចតា ត្រូវបានឆេះនៅក្បែរទីក្រុង Los Angeles។ ហើយបើយោងតាមអាជ្ញាធរ និងរដ្ឋមន្ត្រីសុខាភិបាលទួរគី បានឲ្យដឹងថា មនុស្សយ៉ាងតិច ១២នាក់ បានបាត់បង់ជីវិត និងជាច្រើននាក់ទៀត បានរងរបួស ដោយសារអគ្គិភ័យដែលបានចាប់ផ្តើមកាលពីថ្ងៃទី២០ ខែមិថុនា ពីការដុតសំណល់ដំណាំ។

តែយ៉ាងណាក្ដី លោកបណ្ឌិត Cunningham បាននិយាយថា ទោះបីជាចំហេះព្រៃអាចបណ្តាលឲ្យមនុស្សស្លាប់ និងធ្វើឲ្យសហរដ្ឋអាមេរិកខាតបង់រហូតដល់ ៨៩៣ពាន់លានដុល្លារអាមេរិក ក្នុង ១ឆ្នាំ ដែលរាប់បញ្ចូលទាំងការចំណាយលើការកសាងឡើងវិញ និងផលប៉ះពាល់សេដ្ឋកិច្ច ដោយសារការបំពុល និងការរងរបួសក៏ដោយ ក៏អគ្គិភ័យភាគច្រើន គឺមានលក្ខណៈស្រាល ហើយក្នុងករណីភាគច្រើន មានអត្ថប្រយោជន៍ផ្នែកបរិស្ថាន។ ការសិក្សាបានពិនិត្យទៅលើថាមពលសរុបដែលបញ្ចេញដោយក្រុមនៃព្រឹត្តិការណ៍អគ្គិភ័យ ដែលត្រូវបានកំណត់ថា ជាចំហេះដែលឆាបឆេះក្នុងពេលតែមួយ នៅក្បែរគ្នា ឬនៅកន្លែងតែមួយ ក្នុងរយៈពេលច្រើនដងក្នុងតែមួយថ្ងៃ។ បណ្ដាអ្នកស្រាវជ្រាវបានវិភាគទិន្នន័យរយៈពេល ២១ឆ្នាំ ដែលប្រមូលបានដោយផ្កាយរណបចំនួន ២ របស់អង្គការណាសា (NASA) នៅចន្លោះខែមករា ឆ្នាំ២០០៣ ដល់ខែវិច្ឆិកា ឆ្នាំ២០២៣ ដើម្បីគណនាថា តើសកម្មភាពចំហេះ បានប្រែប្រួលលើសពេលវេលាដែរ ឬអត់៕