ព្រះមហាក្សត្រម៉ារ៉ុក Mohammed VI កាលពីថ្ងៃចន្ទ បានចេញបញ្ជាឲ្យបញ្ជូនជំនួយផ្នែកវេជ្ជសាស្រ្តមនុស្សធម៌ ទៅឲ្យប្រជាជនប៉ាឡេស្ទីន នៅតំបន់ហ្កាហ្សាស្ទ្រីប។

យោងតាមសេចក្តីប្រកាសព័ត៌មានរបស់ក្រសួងការបរទេសម៉ារ៉ុក ជំនួយនេះ មានការផ្គត់ផ្គង់វេជ្ជសាស្រ្តចំនួន ៤០តោន ដែលមានឧបករណ៍សម្រាប់ព្យាបាលការរលាក និងសង្គ្រោះបន្ទាន់ ព្រមទាំងថ្នាំពេទ្យ      សំខាន់ៗ ផងដែរ។

សេចក្តីប្រកាសព័ត៌មាននោះ បានឲ្យដឹងទៀតថា ជំនួយម៉ារ៉ុកនេះ នឹងត្រូវដឹកជញ្ជូនតាមផ្លូវគោកដដែល ដែលបានប្រើសម្រាប់ដឹកជញ្ជូនជំនួយនៅក្នុងខែមីនា អំឡុងពេលដែលប្រទេសនេះ បានបញ្ជូនស្បៀងអាហារជាង ៤០តោន។

ចំពោះស្ថានភាពបច្ចុប្បន្ននៅតំបន់ហ្កាហ្សា ក្រសួងការបរទេសម៉ារ៉ុកមុននេះ បានចេញសេចក្តីថ្លែងការណ៍មួយ ដោយអំពាវនាវឲ្យមានការការពារជនស៊ីវិលស្លូតត្រង់ និងលំហូរនៃជំនួយមនុស្សធម៌ដោយរលូន។