តុលាការឧក្រិដ្ឋកម្មអន្តរជាតិ (ICC) នៅថ្ងៃអង្គារ (ទី២៥ ខែមិថុនា) នេះ បានចេញដីកាចាប់ខ្លួនអតីតរដ្ឋមន្ត្រីការពារជាតិរុស្ស៊ី គឺលោក Sergei Shoigu និងឧត្តមសេនីយជាន់ខ្ពស់របស់រុស្ស៊ី គឺលោក Valery Gerasimov ពីបទប្រព្រឹត្តឧក្រិដ្ឋកម្ម អំឡុងពេលរុស្ស៊ីលុកលុយប្រទេសអ៊ុយក្រែន។

គួរបញ្ជាក់ថា លោក Shoigu ត្រូវបានបញ្ចប់មុខតំណែងជារដ្ឋមន្ត្រីការពារជាតិ កាលពីខែមុន ហើយត្រូវបានតែងតាំងជាលេខាធិការនៃក្រុមប្រឹក្សាសន្តិសុខដ៏មានឥទ្ធិពលរបស់រុស្ស៊ី ដោយនេះជាការផ្លាស់ប្តូរដ៏សំខាន់បំផុតដែលប្រធានាធិបតីរុស្ស៊ី លោក Vladimir Putin បានធ្វើឡើងចំពោះបញ្ជាការយោធារបស់លោក ចាប់តាំងពីសង្រ្គាមចាប់ផ្ដើមក្នុងឆ្នាំ២០២២។

តុលាការដែលមានមូលដ្ឋាននៅទីក្រុងឡាអេ ប្រទេសហូឡង់ បានលើកឡើងថា ទាំងលោក Shoigu និងលោក Gerasimov ត្រូវបានសង្ស័យថា បានប្រព្រឹត្តឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិសម្រាប់ការវាយប្រហារដោយផ្ទាល់លើជនស៊ីវិល និងទ្រព្យសម្បត្តិស៊ីវិល នៅក្នុងប្រទេសអ៊ុយក្រែន។

ICC បានចេញសេចក្ដីប្រកាសព័ត៌មានថា ចៅក្រមបានរកឃើញថា មានមូលដ្ឋានសមហេតុផលក្នុងការជឿថា ជនសង្ស័យទាំង ២នាក់ ត្រូវទទួលខុសត្រូវចំពោះការវាយប្រហារមីស៊ីល ដែលធ្វើឡើងដោយកងកម្លាំងប្រដាប់អាវុធរុស្ស៊ី ប្រឆាំងនឹងហេដ្ឋារចនាសម្ព័ន្ធអគ្គិសនីរបស់អ៊ុយក្រែន ចាប់តាំងពីយ៉ាងហោចណាស់ថ្ងៃទី១០ ខែតុលា ឆ្នាំ២០២២ រហូតដល់យ៉ាងហោចណាស់ថ្ងៃទី៩ ខែមីនា ឆ្នាំ២០២៣។ 

ប្រទេសរុស្ស៊ីដែលមិនមែនជាសមាជិករបស់ ICC បាននិយាយម្តងហើយម្តងទៀតថា ហេដ្ឋារចនាសម្ព័ន្ធថាមពលរបស់អ៊ុយក្រែន គឺជាគោលដៅយោធាស្របច្បាប់ ហើយបដិសេធមិនបានកំណត់គោលដៅលើជនស៊ីវិល ឬហេដ្ឋារចនាសម្ព័ន្ធស៊ីវិលនោះឡើយ៕