ត្បូងឃ្មុំ ៖ រដ្ឋបាលខេត្តត្បូងឃ្មុំ នៅថ្ងៃទី ២៥ ខែមិថុនា ឆ្នាំ២០២៤ បានសហការ​ជាមួយ​អាជ្ញាធរ​ជាតិ​ប្រយុទ្ធប្រឆាំងគ្រឿងញៀន រៀបចំប្រារព្ធធ្វើទិវាជាតិប្រយុទ្ធប្រឆាំងគ្រឿងញៀនថ្ងៃទី២៦ ខែ​មិថុនា ឆ្នាំ២០២៤ ក្រោមប្រធានបទ "រួមគ្នាវិនិយោគលើការបង្ការទប់ស្កាត់ និង​លើក​កម្ពស់​ការ​អប់រំ​ ដើម្បីសហគមន៍គ្មានគ្រឿងញៀន" នៅបរិវេណសាលាវិទ្យាល័យ ហេង សំរិន ចក ស្ថិតនៅ​ឃុំចក ស្រុកអូររាំងឪ ខេត្តត្បូងឃ្មុំ។ ពិធីនេះធ្វើឡើងក្រោមអធិបតីភាពឯកឧត្តម បណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តត្បូងឃ្មុំ និងឯកឧត្តម ឧត្តមសេនីយ៍ទោ ឡេង ប៊ុនណា អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន ។

ឯកឧត្តមបណ្ឌិត ជាម ច័ន្ទសោភ័ណ មានប្រសាសន៍លើកឡើងថា មិនខុសពីឆ្នាំមុនៗនោះទេ ការ​ប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន គិតតាំងពីឆ្នាំ១៩៨៧មក, អង្គការសហប្រជាជាតិ តាមរយៈ​ការិយាល័យទទួលបន្ទុកកិច្ចការ គ្រឿងញៀន និងឧក្រិដ្ឋកម្ម (UNODC) បានដាក់​ចេញ​នូវ​ប្រធាន​បទមួយ នៅរាល់ទិវាអន្តរជាតិ ដោយប្រធានបទឆ្នាំនេះ គឺ រួមគ្នាវិនិយោគ​លើ​ការ​បង្ការ​ទប់​ស្កាត់ និងលើកកម្ពស់ការអប់រំ ដើម្បីសហគមន៍គ្មានគ្រឿងញៀន ដោយផ្ដោតសំខាន់ទៅលើ វិធាន​ការបង្ការ ការពារជាជាងវិធានការបង្ក្រាប និងព្យាបាល ។

ជាមួយការលើកឡើងនេះឯកឧត្តមបណ្ឌិតអភិបាលខេត្ត ក៏បា​ន​សំណូមពរ​ដល់​បង​ប្អូន​ប្រជា​ពលរដ្ឋ​ទាំង​អស់ គ្រប់មជ្ឈដ្ឋាន និងគ្រប់វិស័យ ជាពិសេសសិស្សានុសិស្ស សូម​បន្ត​អនុវត្ត​ស្មារតី​ជាតិ​របស់យើង គឺចាត់ទុកបញ្ហាគ្រឿងញៀនជាបញ្ហារួម ដែលត្រូវចូលរួមដោះស្រាយ និង​លុប​បំបាត់​ទាំងអស់គ្នា។ ទាំងនេះ គឺផ្តើមចេញពីថ្នាក់ដឹកនាំ ក្រសួង ស្ថាប័ន និងយើងទាំងអស់គ្នា តាមរ​យៈការអប់រំ ក្រើនរំលឹក ពីផលប៉ះពាល់វិនាសកម្ម នៃគ្រឿងញៀន និងត្រូវ​មាន​ជំហរ​ដាច់ខាត មិនថាក្នុងកាលៈទេសៈណាក៏ដោយ គឺមិនពាក់ព័ន្ធនឹងគ្រឿងញៀនឡើយ។

បើ​តាម​របាយការណ៍របស់លោក ងិន ពេជ្រ ព្រះរាជអាជ្ញា នៃអយ្យការអមសាលាដំបូងខេត្តត្បូងឃ្មុំ បានឲ្យ​ដឹងថា ទិន្នន័យសំណុំរឿង និងវត្ថុតាងជាគ្រឿងញៀន ដែលគណៈកម្មការ​ដុត​បំផ្លាញ​គ្រឿង​ញៀន នៃសាលាដំបូងខេត្តត្បូងឃ្មុំ បានរៀបចំវេចខ្ចប់ វត្ថុតាមទាំងអស់នេះ តាមលក្ខណៈ​បច្ចេក​ទេស និងមានសុវត្ថិភាព ដោយក្នុងនោះសំណុំរឿងដែលមានសាលក្រមស្ថាពរ និងដីការ​សម្រេច មានចំនួន ៤២សំណុំរឿង មានវត្ថុតាងគ្រឿងញៀន ប្រភេទមេតាំហ្វេតាមីន ទម្ងន់ ៤៩៩.៤៩​ក្រាម និងសំណុំរឿងដែលមានសាលក្រមមិនទាន់ស្ថាពរ និងដីកាសម្រេច មានចំនួន ៨២ សំណរឿង មានវត្ថុតាងគ្រឿងញៀន ប្រភេទមេតាំហ្វេតាមីន ទម្ងន់ ៤,៨៣៥.០៥​ក្រាមផ​ង​ដែរ​។