សំឡេងភាគច្រើននៃយុត្តិធម៌ នៅតុលាការកំពូលរបស់ប្រទេសប្រេស៊ីល កំពុងគាំទ្រការផ្តល់ភាពស្របច្បាប់ចំពោះការកាន់កាប់កញ្ឆាសម្រាប់ការប្រើប្រាស់ផ្ទាល់ខ្លួន បន្ទាប់ពីការបោះឆ្នោតដ៏សំខាន់មួយ កាលពីថ្ងៃអង្គារ ទី២៥ មិថុនា។ ចៅក្រម លោក ឌៀស តូហ្វូលី(Dias Toffoli) ជា ចៅក្រមទីប្រាំមួយនៅតុលាការកំពូលដែលមានសមាជិក១១រូប ក្នុងការបោះឆ្នោតផ្តល់ភាពស្របច្បាប់ចំពោះកញ្ឆាបាននិយាយថា «ជំហរគឺច្បាស់ណាស់ថា គ្មានអ្នកប្រើប្រាស់គ្រឿងញៀនណាម្នាក់អាចត្រូវបានចាត់ទុកថាជាឧក្រិដ្ឋជននោះទេ»។

រហូតមកដល់ពេលនេះ ចៅក្រមបីរូប បានជំទាស់ទៅនឹងសេចក្តីសម្រេច ចំពោះការកាន់កាប់កញ្ឆាថាលែងជាករណីព្រហ្មទណ្ឌ រួមទាំងសមាជិកថ្មីបំផុតរបស់ខ្លួនគឺលោក គ្រីសៀណូ ហ្សានីន(Cristiano Zanin) ដែលត្រូវបានតែងតាំងដោយប្រធានាធិបតីឆ្វេងនិយម លោក លូអ៊ីស អ៊ីណាស៊ីញ៉ូ លូឡា ដា ស៊ីលវ៉ា(Luiz Inacio Lula da Silva)។

ការប្រើប្រាស់កញ្ឆាជាសាធារណៈនឹងបន្តត្រូវបានហាមឃាត់ ហើយកញ្ឆានៅតែខុសច្បាប់នៅក្នុងប្រទេសប្រេស៊ីល។ ការផ្តល់ភាពច្បាប់នៃការប្រើប្រាស់ ត្រូវបានពិភាក្សាដោយតុលាការកំពូលចាប់តាំងពីឆ្នាំ២០១៥ ហើយចៅក្រម បានឈានដល់សំឡេងភាគច្រើន នៅពេលដែលអ្នកនយោបាយកំពុងស្នើបម្រាមតាមរដ្ឋធម្មនុញ្ញ លើការប្រើប្រាស់គ្រឿងញៀនខុសច្បាប់។

សេចក្តីស្នើច្បាប់ដែលកំពុងពន្លឿននៅក្នុងសភា ដោយមានការគាំទ្រពីសមាជិកសភាគណបក្សអភិរក្សនិយម និងសមាជិកនៃក្រុមសាសនា បានស្នើសុំវិសោធនកម្មរដ្ឋធម្មនុញ្ញ សម្រាប់ការប្រើប្រាស់ និង កាន់កាប់គ្រឿងញៀនប្រភេទណាមួយ ជាបទល្មើសព្រហ្មទណ្ឌ។