ដោយលយចូលចម្ងាយ១.២០០ហ្វីត ចូលទៅក្នុងសមុទ្រមេឌីទែរ៉ាណេ ពីឆ្នេរសមុទ្រតំបន់ហ្កាហ្សា កំពង់ផែបណ្តែតទឹករបស់យោធាសហរដ្ឋអាមេរិក ត្រូវបានបោកបក់ដោយទឹករលក។

ប្រធានាធិបតីសហរដ្ឋអាមេរិក លោក Joe Biden បានប្រកាសកាលពីខែមីនា អំពីផែនការដាក់កំពង់ផែសម្រាប់ការដឹកជញ្ជូនជំនួយ ខណៈគ្រោះទុរ្ភិក្សនឹងកើតឡើងនៅក្នុងតំបន់ហ្កាហ្សា ជាតំបន់ហ៊ុមព័ទ្ធ គ្រប់គ្រងដោយក្រុមហាម៉ាស មានប្រជាជនចំនួន២,៣លាននាក់រស់នៅ ក្នុងអំឡុងពេលសង្រ្គាមរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន។

គិតត្រឹមថ្ងៃអង្គារម្សិលមិញ ជំនួយចំនួន ៨.៣៣២ ប៉ាឡែត ឬទម្របន្ទះឈើ ត្រូវបានដឹកជញ្ជូនតាមកំពង់ផែបណ្តែតទឹកនៅហ្កាហ្សា។

ប៉ុន្តែ ប៉ាឡែតជិត ៦.៩០០ កំពុងស្ថិតនៅលើឆ្នេរតំបន់ហ្កាហ្សា ក្នុងតំបន់ការពារ ដោយរង់ចាំអង្គការសហប្រជាជាតិមកទទួល សម្រាប់បែងចែក។

កម្មវិធីស្បៀងអាហារពិភពលោក បានផ្អាកការដឹកជញ្ជូនរបស់ខ្លួនកាលពីដើមខែនេះ ដោយសារតែការព្រួយបារម្ភពីសុវត្ថិភាព។

ក្រៅពីជំនួយដែលកំពុងនៅដាក់គរនៅឆ្នេរនោះ កំពង់ផែកំពុងរកវិធីដោះស្រាយបញ្ហាជាច្រើន។ កំពង់ផែត្រូវបានផ្អាកជាច្រើនលើក ដោយសារតែស្ថានភាពទឹកសមុទ្រ នៅពេលខ្លះ ត្រូវបានគេអូសសណ្តោងទៅកាន់កំពង់ផែ Ashdod របស់អ៊ីស្រាអែល ដើម្បីជួសជុល។

មន្ត្រីជាន់ខ្ពស់អាមេរិកម្នាក់ បាននិយាយកាលពីថ្ងៃអង្គារថា កំពង់ផែ អាចនឹងត្រូវបានបន្ថែមពេលហួសពីកាលបរិច្ឆេទអនុញ្ញាតនៅថ្ងៃទី៣១ ខែកក្កដា ប្រសិនបើសហរដ្ឋអាមេរិក និងអង្គការផ្តល់ជំនួយ អាចទទួលបានលំហូរជំនួយទៅកាន់ដែនដីប៉ាឡេស្ទីន ក្នុងរយៈពេលប៉ុន្មានថ្ងៃ និងសប្តាហ៍ខាងមុខ។