យោងតាមសេចក្តីរាយការណ៍ពីប្រព័ន្ធផ្សព្វផ្សាយជាច្រើន បានឲ្យដឹងថា លោកស្រី Ursula von der Leyen មកពីប្រទេសអាល្លឺម៉ង់ ត្រៀមខ្លួនសម្រាប់អាណត្តិទីពីរ ជាប្រធានគណៈកម្មការអឺរ៉ុប បន្ទាប់ពីមេដឹកនាំនយោបាយសហភាពអឺរ៉ុប បានឈានដល់ការស្របមតិគ្នា កាលពីថ្ងៃអង្គារ ។

ដោយដកស្រង់សម្តីមន្ត្រីមកពីសហភាពអឺរ៉ុប ប្រព័ន្ធផ្សព្វផ្សាយ Politico បាននិយាយថា កិច្ចព្រមព្រៀងនេះ ត្រូវបានឈានដល់ក្នុងចំណោមមេដឹកនាំសហភាពអឺរ៉ុបចំនួន៦រូប រួមមាននាយករដ្ឋមន្ត្រីប្រទេសក្រិក នាយករដ្ឋមន្ត្រីប្រទេសប៉ូឡូញ នាយករដ្ឋមន្ត្រីអេស្ប៉ាញ អធិការបតីអាល្លឺម៉ង់ ប្រធានាធិបតីបារាំង និងនាយករដ្ឋមន្ត្រីប្រទេសហូឡង់។

មេដឹកនាំទាំង៦រូប មកពីក្រុមនិយមកណ្តាលសំខាន់ៗចំនួនបី ក៏បានយល់ព្រមចំពោះកញ្ចប់ដែលនឹងមើលឃើញអតីតនាយករដ្ឋមន្ត្រីប្រទេសព័រទុយហ្គាល់ លោក Antonio Costa ក្លាយជាប្រធានក្រុមប្រឹក្សាអឺរ៉ុប ហើយនាយករដ្ឋមន្ត្រីប្រទេសអេស្តូនី លោក Kaja Kallas ជាប្រធានគោលនយោបាយការបរទេស របស់សហភាពអឺរ៉ុប។

បណ្តាមេដឹកនាំ មកពីប្រទេសជាសមាជិកសហភាពអឺរ៉ុប កំណត់ពេលអនុម័តកិច្ចព្រមព្រៀងនេះ នៅក្នុងកិច្ចប្រជុំកំពូលរបស់សហភាពអឺរ៉ុបនាពេលខាងមុខ នៅទីក្រុងព្រុចសែល ដែលនឹងចាប់ផ្តើមនៅថ្ងៃព្រហស្បតិ៍។

ទោះជាយ៉ាងណា កិច្ចព្រមព្រៀងនេះ បានប្រឈមមុខទៅនឹងការរិះគន់។ នាយករដ្ឋមន្ត្រីប្រទេសហុងគ្រី លោក Viktor Orban បានសម្តែងការមិនពេញចិត្តរបស់លោកនៅលើវេទិកាប្រព័ន្ធផ្សព្វផ្សាយសង្គម X ដោយនិយាយថា កិច្ចព្រមព្រៀងនេះជំរុញការបែកបាក់គ្នាជាជាងការរួបរួមគ្នា។

លោកនិយាយថា មន្រ្តីជាន់ខ្ពស់របស់សហភាពអឺរ៉ុប គួរតែតំណាងឱ្យរដ្ឋសមាជិកទាំងអស់ ពុំមែនត្រឹមតែក្រុមឆ្វេងនិយម និងក្រុមសេរីនិយាយនោះទេ។