ប្រមុខសេវាវេជ្ជសាស្ត្រសហរដ្ឋអាមេរិក កាលពីថ្ងៃអង្គារ (ទី២៥ ខែមិថុនា) បានប្រកាសអំពីអំពើហិង្សាដោយកាំភ្លើងនៅក្នុងប្រទេសថា ជាវិបត្តិសុខភាពសាធារណៈ ដោយអំពាវនាវឲ្យប្រជាជនអាមេរិកធ្វើសកម្មភាព ដើម្បីទប់ស្កាត់ការកើនឡើងនូវការស្លាប់ទាក់ទងនឹងអាវុធ និងផលប៉ះពាល់មិនអាចដឹងជាមុនបាន ជាពិសេសលើជនជាតិអាមេរិកស្បែកខ្មៅ យុវជនអាមេរិក និងប្រជាជនដទៃទៀត។

នៅក្នុងព្រឹត្តិការណ៍ប្រឹក្សាយោបល់សុខភាពសាធារណៈលើកដំបូងដែលមិនធ្លាប់មាន ស្តីពីអំពើហិង្សាដោយកាំភ្លើង មន្ត្រីសុខភាពសាធារណៈជាន់ខ្ពស់របស់ជាតិ គឺលោក Vivek Murthy បានលើកឡើងត្រួសៗនូវអ្វីដែលលោកហៅថា ផលវិបាកដ៏បំផ្លិចបំផ្លាញ និងធ្ងន់ធ្ងរដល់សុខុមាលភាពសាធារណៈ ហើយបានអំពាវនាវឲ្យមានមូលនិធិស្រាវជ្រាវបន្ថែមទៀត លទ្ធភាពទទួលបានសុខភាពផ្លូវចិត្តកាន់តែប្រសើរឡើង និងជំហានផ្សេងៗទៀត ដូចជាកន្លែងស្តុកសុវត្ថិភាព ដើម្បីកាត់បន្ថយគ្រោះថ្នាក់ជាដើម។

ប្រមុខសេវាវេជ្ជសាស្ត្រយោធាអាមេរិក លោក Murthy បានប្រាប់សារព័ត៌មាន Reuters កាលពីថ្ងៃអង្គារថា៖ «ខ្ញុំគិតថា ប្រសិនបើអ្នកនិយាយជាមួយវេជ្ជបណ្ឌិត ឬគិលានុបដ្ឋាយិកាណាម្នាក់ដែលធ្វើការ នៅមន្ទីរពេទ្យ ឬមើលថែទាំអ្នកជំងឺដែលមានរបួសទាក់ទងនឹងអំពើហិង្សាដោយកាំភ្លើង ទាំងផ្លូវកាយ ឬផ្លូវចិត្ត ពួកគេនឹងប្រាប់អ្នកថា នេះគឺជាវិបត្តិសុខភាពយ៉ាងពិតប្រាកដ»។

លោក Murthy បានប្រាប់បន្ថែមថា ផលប៉ះពាល់នៃអំពើហិង្សាដោយកាំភ្លើង រីករាលដាលលើសពីចំនួនដ៏គួរឲ្យភ្ញាក់ផ្អើលនៃការបាត់បង់ជីវិត។ វាប៉ះពាល់ដល់មនុស្សរាប់លាននាក់ដែលត្រូវបានបាញ់ប្រហាររហូតដល់ស្លាប់ និងអ្នកដែលបានរួចជីវិតពីហេតុការណ៍នោះៗ ក៏ដូចជាអ្នកដែលបានឃើញអំពើហិង្សាដោយកាំភ្លើង អ្នកបាត់បង់សមាជិកគ្រួសារ ឬអ្នកដែលបានដឹងពីហេតុការណ៍តាមរយៈព័ត៌មាន។

ជាមួយគ្នានេះ របាយការណ៍បានកត់សម្គាល់ថា នៅឆ្នាំ២០២០ អំពើហិង្សាដោយកាំភ្លើង បានក្លាយជាមូលហេតុនាំមុខគេនៃការស្លាប់ក្នុងចំណោមកុមារ និងមនុស្សវ័យជំទង់របស់សហរដ្ឋអាមេរិក៕