នៅពេលដែលពិភពលោកកំពុងប្រឈមជាមួយនឹងការប្រណាំងប្រជែងអាវុធនុយក្លេអ៊ែរថ្មី មានចំណុចបញ្ឆេះនាពេលខាងមុខជាច្រើនដែលអាចបង្កឲ្យសកលលោកជួបនឹងមហាមហន្តរាយ។

ជាក់ស្ដែង ប្រធានាធិបតីរុស្ស៊ី លោក Vladimir Putin បានចេញការគំរាមកំហែងដ៏គួរឲ្យភ័យខ្លាចថា នឹងប្រើប្រាស់អាវុធនុយក្លេអ៊ែរ ខណៈដែលភាពតានតឹង នៅក្នុងអ៊ុយក្រែន គ្មានសញ្ញាថមថយ។ លើសពីនោះទៀត ភាពជាដៃគូថ្មី រវាងរុស្ស៊ី និងកូរ៉េខាងជើង ត្រូវបានបង្កើតឡើង ដោយលោក គីម ជុងអ៊ុន អាចនឹងផ្ដល់ផ្តល់អាវុធ ជាថ្នូរនឹងជំនាញនុយក្លេអ៊ែរ។

ជាមួយគ្នានេះ មានការប្រៀបធៀប រវាងសមយុទ្ធសង្រ្គាមនាពេលថ្មីៗនេះរបស់លោក Putin នៅឯឆ្នេរសមុទ្រនៃប្រទេសគុយបា និងការប្រឈមមុខដាក់គ្នាដ៏តានតឹងក្នុងឆ្នាំ១៩៦៣ រវាងសហរដ្ឋអាមេរិក និងសហភាពសូវៀត ដែលមនុស្សជាតិ នៅកៀកបំផុត មិនធ្លាប់មានចំពោះសង្គ្រាមនុយក្លេអ៊ែរ។ តែទោះជាយ៉ាងណាក៏ដោយ ភាពតានតឹងកើនឡើងជាមួយរុស្ស៊ីសម័យទំនើប មិនមែនជាតំបន់តែមួយគត់ ដែលការគំរាមកំហែងនុយក្លេអ៊ែរហាក់ដូចជាអាចធ្វើទៅបាននោះឡើយ។

សារព័ត៌មាន Daily Star រាយការណ៍ថា ប្រទេសចិនកំពុងពង្រីកឃ្លាំងអាវុធនុយក្លេអ៊ែររបស់ខ្លួនលឿនជាងប្រទេសដទៃទៀត ហើយហានិភ័យធំៗ កំពុងលេចឡើងនៅអាស៊ី និងមជ្ឈិមបូព៌ា។

គួរបញ្ជាក់ថា ដូចការរាយការណ៍របស់សារព័ត៌មាន Mirror របាយការណ៍មួយពីវិទ្យាស្ថានស្រាវជ្រាវសន្តិភាពអន្តរជាតិទីក្រុង Stockholm ប្រទេសស៊ុយអែត បានបង្ហាញថា «ចំនួន និងប្រភេទអាវុធនុយក្លេអ៊ែរ ក្នុងដំណើរការអភិវឌ្ឍន៍ បានកើនឡើង ខណៈដែលរដ្ឋនានា បង្កើនការពឹងផ្អែករបស់ពួកគេលើការទប់ស្កាត់នុយក្លេអ៊ែរ»៕