សមាជិកនាវិកនៃនាវាមួយគ្រឿង ដែលត្រូវបានចាប់ខ្លួននៅក្នុងប្រទេសក្រិក ជុំវិញការចោទប្រកាន់ថាបានបង្កចំហេះព្រៃ នៅលើកោះ Hydra បានបង្ហាញខ្លួន នៅចំពោះមុខចៅក្រម ក្នុងទីក្រុងកំពង់ផែ ពីរ៉ាយអ៊ូស(Piraeus) នៅថ្ងៃពុធ ទី២៦ ខែមិថុនានេះ ដើម្បីឆ្លើយតបទៅនឹងបទចោទប្រកាន់។

នាវិកទាំង១៣នាក់ ត្រូវបានចោទប្រកាន់ពីបទបង្កអគ្គិភ័យ កាលពីថ្ងៃអាទិត្យ ទី២៣ ខែ មិថុនា បន្ទាប់ពីបានបាញ់កាំជ្រួចចេញពីនាវា ដែលតាមការចោទប្រកាន់ ថាបានបង្កឱ្យមានចំហេះព្រៃនៅលើកោះ Hydra។

អគ្គិភ័យ បានឆាបឆេះ កាលពីល្ងាចថ្ងៃសុក្រ ដោយបានឆាបបំផ្លាញផ្នែកមួយចំនួននៃព្រៃស្រល់នៅលើកោះ មុនពេលក្រុមអ្នកពន្លត់អគ្គិភ័យ បានទប់ស្កាត់អណ្តាតភ្លើង នៅព្រឹកថ្ងៃសៅរ៍។

ប្រភពផ្លូវច្បាប់ដែលពាក់ព័ន្ធក្នុងករណីនេះ បាននិយាយថា សមាជិកនាវិករបស់នាវា ត្រូវបានចាប់ខ្លួនកាលពីថ្ងៃសៅរ៍ នៅកំពង់ផែលំហែរកម្សាន្តមួយកន្លែងក្បែរទីក្រុង Athens។ ពួកគេទាំងអស់ បានបដិសេធថាពុំបានធ្វើខុសណាមួយ ហើយនឹងបញ្ជាក់ពីជំហររបស់ពួកគេឡើងវិញ នៅពេលបង្ហាញខ្លួននៅចំពោះមុខចៅក្រមស៊ើបអង្កេត។

កោះ Hydra ស្ថិតនៅភាគនិរតីទីក្រុង Athens ក្នុងឈូងសមុទ្រ Saronic គឺជាកោះដែលគ្មានរថយន្ត បើកបរ ពេញនិយមដោយអ្នកទេសចរជួលទូកជិះកម្សាន្ត ទៅលេងឆ្នេរនៅកោះនេះ។