ប្រធានាធិបតីអ៊ុយក្រែន លោក Volodymyr Zelenskyy បានដាក់ជំនួសមេបញ្ជាការ ដែលត្រួតពិនិត្យកងកម្លាំងរួមរបស់យោធាអ៊ុយក្រែន ក្នុងសង្គ្រាមប្រឆាំងរុស្ស៊ី។

លោក Zelenskyy បានប្រកាសនៅក្នុងសារជាវីដេអូ ថា មុខតំណែងដែលកាន់ដោយឧត្តមសេនីយ៍ទោ Yuriy Sodol នឹងប្រគល់ទៅឲ្យឧត្តមសេនីយត្រី Andriy Hnatov ។

លោក Zelenskyy ពុំបានផ្តល់មូលហេតុសម្រាប់ការដាក់ជំនួសនេះទេ ប៉ុន្តែសេចក្តីរាយការណ៍របស់ប្រព័ន្ធផ្សព្វផ្សាយអ៊ុយក្រែន បាននិយាយថា អង្គភាពមួយចំនួនបានរិះគន់កាន់តែខ្លាំងឡើងចំពោះការបាត់បង់ការគាំទ្រដោយយោធា ក្រោមការដឹកនាំរបស់លោក Sodol។

សារព័ត៌មាន New York Times បានកត់សំគាល់ពីចំណាត់ការបែបនេះ បន្ទាប់ពីការដកចេញអគ្គមេបញ្ជាការនៃការកម្លាំងប្រដាប់អាវុធម្នាក់ លោក Valerii Zaluzhnyi ដែលមានប្រជាប្រិយភាពខ្ពស់ កាលពីខែកុម្ភៈ។

សារព័ត៌មាន និយាយថា ការសម្រេចចិត្តរបស់ លោក Zelenskyy បន្តគំរាមកំហែងដល់សាមគ្គីភាពផ្នែកយោធា។

ប្រជាជនអ៊ុយក្រែន បានបង្ហាញក្តីសង្ឃឹមថា ភាពរង្គោះរង្គើនេះ នឹងជួយធ្វើឲ្យប្រសើដល់ស្ថានភាពនៅសមរភូមិភាគខាងកើត ដែលកងកម្លាំងអ៊ុយក្រែន កំពុងតស៊ូទប់ទល់។

ពលរដ្ឋនៅក្នុងរដ្ឋធានីគីវ បានប្រាប់ប្រព័ន្ធផ្សព្វផ្សាយ NHK កាលពីថ្ងៃអង្គារថា អ៊ុយក្រែន មានសត្រូវ ដែលមានកម្លាំងខ្លាំង ហើយពួកគេសង្ឃឹមថា ការដោះដូរនេះ នឹងធ្វើឲ្យស្ថានភាពល្អប្រសើរ។