ទិន្នន័យ បានបង្ហាញនៅថ្ងៃពុធនេះថា ចំនួនទារកដែលកើតនៅក្នុងប្រទេសកូរ៉េខាងត្បូង មានការកើនឡើងប្រចាំឆ្នាំ ជាលើកដំបូង ក្នុងរយៈពេល១៩ខែ ក្នុងខែមេសា ខណៈដែលប្រទេសនេះ កំពុងខិតខំប្រឹងប្រែង ដើម្បីជំរុញអត្រាកំណើតទាបបំផុតរបស់ខ្លួននោះ។

ទារកសរុបចំនួន ១៩.0៤៩នាក់ បានកើតក្នុងខែមេសា ឆ្នាំ ២០២៤ កើនឡើង ២,៨ ភាគរយ បើធៀបនឹងឆ្នាំមុន។ នេះបើយោងតាមទិន្នន័យ ដែលបានចងក្រងដោយការិយាល័យស្ថិតិកូរ៉េ (Statistics Korea)។

នេះគឺជាលើកដំបូង ចាប់តាំងពីខែកញ្ញា ឆ្នាំ ២០២២ ដែលតួលេខនេះ បានកត់ត្រាកំណើនប្រចាំឆ្នាំ។

មន្ត្រីទីភ្នាក់ងារមួយ បាននិយាយថា៖«កំណើននេះ បានកើតឡើង នៅពេលដែលចំនួនគូស្វាមីភរិយាថ្មីថ្មោង បានកើនឡើងក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីជំងឺរាតត្បាត COVID-19 ទោះបីជាវានៅតែត្រូវមើលថា តើនិន្នាការកើនឡើងបែបនេះ អាចបន្តឬយ៉ាងណា»។

ការស្ទុះងើបឡើងវិញ ក៏បណ្តាលមកពីឥទ្ធិពលមូលដ្ឋានខ្ពស់ផងដែរ ដោយសារចំនួនទារកទើបនឹងកើតនៅកម្រិតទាបបំផុត គឺ ១៨.៥២៨នាក់ ក្នុងខែមេសា ឆ្នាំ ២០២៣ គឺធ្លាក់ចុះ ១២,៥ភាគរយកាលពីឆ្នាំ  មុន។

ទោះបីជាយ៉ាងណាក៏ដោយ ក្នុងអំឡុងពេល ៤ខែដំបូងនៃឆ្នាំ ២០២៤ ចំនួនទារកទើបនឹងកើត ឈានដល់កម្រិតទាបបំផុតគឺ ៧៩.៥២៣នាក់។