ក្នុងរបាយការណ៍មួយដែលចេញផ្សាយនៅថ្ងៃពុធ (ទី២៦ ខែមិថុនា) នេះ អ្នកជំនាញអង្គការសហប្រជាជាតិ (UN) បានលើកឡើងថា កិច្ចប្រឹងប្រែងអន្តរជាតិ ដើម្បីផ្ដល់ភាពឯកោដល់របបយោធាដែលកំពុងកាន់អំណាចរបស់សហភាពមីយ៉ាន់ម៉ា ហាក់ដូចជាបានរារាំងលទ្ធភាពរបស់របបនេះមិនឲ្យទិញយុទ្ធោបករណ៍ថ្មីពីបរទេស ប៉ុន្តែផ្ទុយទៅវិញ ពួកយោធានៅតែអាចទទួលបានប្រាក់ និងអាវុធ ដើម្បីយកទៅធ្វើសង្គ្រាមទល់នឹងកងកម្លាំងប្រឆាំងរដ្ឋប្រហារដដែល។

គួរបញ្ជាក់ថា សហភាពមីយ៉ាន់ម៉ាបានធ្លាក់ចូលទៅក្នុងភាពចលាចល គិតចាប់តាំងពីយោធាបានដណ្តើមអំណាចពីរដ្ឋាភិបាលជាប់ឆ្នោត នៅក្នុងរដ្ឋប្រហារឆ្នាំ២០២១ ដែលបង្កឲ្យមានការដាក់ទណ្ឌកម្មផ្នែកហិរញ្ញវត្ថុលើយោធា ធនាគារ និងអាជីវកម្មដែលពាក់ព័ន្ធផ្សេងទៀត ពីសំណាក់បណ្តាប្រទេសលោកខាងលិច។

ជាង ៣ឆ្នាំមកនេះ ចលនាតវ៉ាប្រឆាំងនឹងរដ្ឋប្រហារ បានវិវត្តទៅជាសង្រ្គាមស៊ីវិលពេញលេញ ដោយយោធាត្រូវបានចោទប្រកាន់ថា បានបើកការវាយប្រហារតាមអាកាសលើក្រុមបះបោរ និងជនស៊ីវិលដូចគ្នា ខណៈដែលខ្លួនបានបាត់បង់ការគ្រប់គ្រងលើដែនដីដ៏ធំ។

របាយការណ៍របស់អ្នករាយការណ៍ពិសេសរបស់ UN ទទួលបន្ទុកស្ថានភាពសិទ្ធិមនុស្ស នៅមីយ៉ាន់ម៉ា លោក Tom Andrews បានរកឃើញថា តម្លៃអាវុធ បច្ចេកវិទ្យាប្រើប្រាស់បានទាំងស៊ីវិល និងយោធា ឧបករណ៍វិស្វកម្ម និងសម្ភារៈផ្សេងទៀតដែលនាំចូលដោយរបបយោធា មានចំនួន ២៥៣លានដុល្លារអាមេរិក ក្នុងឆ្នាំរហូតដល់ខែមីនា ឆ្នាំ២០២៤។ របាយការណ៍បានបន្ថែមថា ចំនួននោះ គឺតិចជាងឆ្នាំមុន ១ភាគ៣ ដោយសារកិច្ចប្រឹងប្រែងរបស់ប្រទេសសិង្ហបុរីដែលរារាំងក្រុមហ៊ុនរបស់ខ្លួនមិនឲ្យជួយដល់របបយោធា។

ក្នុងបទសម្ភាសន៍ជាមួយសារព័ត៌មាន Reuters លោក Andrews បានប្រាប់ថា ដំណើរការនេះបង្ហាញថា ទណ្ឌកម្ម និងកិច្ចប្រឹងប្រែងអន្តរជាតិផ្សេងទៀត អាចជះឥទ្ធិពលដល់សមត្ថភាពរបស់របបយោធា ក្នុងការទទួលបានសម្ភារផ្គត់ផ្គង់ ហើយបន្ទាប់មក កាត់បន្ថយសមត្ថភាពរបស់យោធាក្នុងការបើកការវាយប្រហារនានា ដូចជាការវាយប្រហារតាមអាកាសដែលបានសម្លាប់ជនស៊ីវិល នៅក្នុងភូមិជាច្រើន៕