សារព័ត៌មាន Tunis Afrique Presse (TAP) បានរាយការណ៍កាលពីថ្ងៃអង្គារថា ទុយនីស៊ី កំពុងជួបវិបត្តិទឹកកាន់តែអាក្រក់ឡើងៗ ខណៈដែលតម្រូវការលើសពីការផ្គត់ផ្គង់ដែលមាន។

លោក Chawki Ben Mansour ប្រធាននៃក្រុមហ៊ុនជាតិនៃការធ្វើអាជីវកម្ម និងចែកចាយទឹក (SONEDE) ត្រូវបានដកស្រង់សម្តីដោយសារព័ត៌មានTAP ថា៖«ទឹកបំរុងនៃទំនប់ទឹកទុយនីស៊ី បានឈានដល់កម្រិតទាបបំផុត នៅក្នុងតំបន់ផ្សេងៗគ្នា ក្នុងប្រទេសនេះ»។

លោក Mansour បាននិយាយថា ទឹកបំរុងនៅទំនប់ទឹកទុយនីស៊ី ដែលត្រូវបានប៉ាន់ប្រមាណថា មានប្រហែល ៧២០លានម៉ែត្រគូប បានកត់ត្រាការស្រកប្រហែល ២០០លានម៉ែត្រគូប បើធៀបនឹងរយៈពេលដូចគ្នា កាលពីឆ្នាំមុន។ លោក Mansour បានអំពាវនាវដល់ប្រជាពលរដ្ឋឲ្យគាំទ្រគោលនយោបាយសន្សំសំចៃទឹក។

លោក Mansour បានបន្ថែមថា SONEDE បានចាប់ផ្តើមយុទ្ធនាការផ្សព្វផ្សាយមួយសប្តាហ៍មុន ដើម្បីជូនដំណឹងដល់ប្រជាពលរដ្ឋអំពីស្ថានភាពវិបត្តិទឹកដ៏ធ្ងន់ធ្ងរ ដែលបណ្តាលមកពីគ្រោះរាំងស្ងួត និងកង្វះទឹក ភ្លៀង។

ដើម្បីឆ្លើយតបទៅនឹងវិបត្តិទឹកកាន់តែអាក្រក់ឡើងនេះ ទុយនីស៊ី បានដំឡើងថ្លៃទឹកផឹករហូតដល់ ១៦ ភាគរយ នៅក្នុងខែមីនា។