អាកាសធាតុរដូវក្តៅក្តៅខ្លាំង បានធ្វើឲ្យមានស្ថានភាពទុក្ខជាន់លើទុក្ខនៅក្នុងតំបន់ហ្កាហ្សា ជាកន្លែងដែលមនុស្សជិត ២,៣លាននាក់ បានចាកចេញពីផ្ទះសម្បែងរបស់ពួកគេ ដោយសារយុទ្ធនាការសឹករបស់អ៊ីស្រាអែល ហើយនិងជាកន្លែងដែលស្ទើតែគ្មានចរន្តអគ្គិសនី និងទឹកស្អាតទាល់តែសោះ ។ 

ក្រុមគ្រួសាររស់ក្នុងសំពត់តង់ នៅជំរំមានមនុស្សច្រើនកុះករ នៅតាមសាលារៀនរបស់អង្គការសហប្រជាជាតិ ឬតាមផ្ទះផ្ទាល់ខ្លួន បានប្រឈមនឹងសីតុណ្ហភាពហក់ឡើងខ្ពស់អំឡុងរដូវក្តៅ ដោយពួកគេគ្មានម៉ាស៊ីនត្រជាក់ ឬប្រព័ន្ធសុខភាពដំណើរការ ស្របពេលដែលអត្រាកើនឡើងនៃកង្វះខាតអាហារូបត្ថម្ភ និងជំងឺ ។ 

នៅក្នុងបន្ទប់រៀន ដែលជាជម្រករួមគ្នាជាមួយគ្រួសារផ្សេងទៀត ស្ថិតក្នុងទីក្រុង Khan Younis នៅភាគខាងត្បូងតំបន់ហ្កាហ្សាស្រ្ទីប អ្នកស្រី Amal Nsair វ័យ ៣៨ឆ្នាំ មានការព្រួយបារម្ភថា កម្តៅកើនឡើង និងស្ថានភាពអាកាសធាតុក្តៅស្ងួត ក៏ដូចជាមូសមានកាន់តែច្រើន និងសត្វល្អិតផ្សេងទៀត នឹងធ្វើឲ្យប៉ះពាល់ដល់សុខភាពរបស់ពួកគេ ។ 

កូនប្រុសរបស់គាត់មិនអាចដេកបានទេ ហើយគាត់គ្មានអ្វីធ្វើឲ្យកូនគាត់ត្រជាក់នោះដែរ ក្រៅពីផ្លិតធ្វើពីក្រដាសកាតុង ។ ផ្ទះរបស់គ្រួសារគាត់ ស្ថិតនៅទីក្រុង Beit Hanoun នៅភាគខាងជើងតំបន់ហ្កាហ្សាស្រ្ទីប ដែលពួកគេបានរត់ភៀសខ្លួនចេញពេលសង្រ្គាមចាប់ផ្តើមភ្លាមៗ ៕