ចៅក្រមនៅតុលាការឧក្រិដ្ឋកម្មអន្តរជាតិ (ICC) នាថ្ងៃពុធ (ទី២៦ ខែមិថុនា) នេះ បានកាត់ទោសសមាជិកក្រុមឧទ្ទាមឥស្លាមម៉ាលីម្នាក់ពីបទប្រព្រឹត្តឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ សម្រាប់ការមានតួនាទីដ៏សំខាន់ នៅក្នុងជួរនគរបាលឥស្លាម ដែលបានវាយដំអ្នកស្រុក នៅទីក្រុង Timbuktu អំឡុងពេលដែលពួកឧទ្ទាមនេះ កាន់អំណាចនៅឆ្នាំ២០១២។

នៅក្នុងសេចក្ដីសង្ខេបសាលក្រមរបស់ខ្លួន ចៅក្រមបានលើកឡើងថា លោក Al Hassan Ag Abdoul Aziz បានដើរតួនាទីយ៉ាងសំខាន់ នៅក្នុងក្រុម Ansar Dine Islamist ដែលបានកាន់កាប់ទីក្រុងនៅលើជ្រុងនៃវាលខ្សាច់សាហារ៉ា ក្នុងឆ្នាំ២០១២ ហើយបានព្យាយាមដាក់ចេញនូវច្បាប់សាសនាឥស្លាមនិកាយសារៀ (Sharia)។

អ្នកស្រុកមូលដ្ឋានបានផ្តល់សក្ខីកម្មថា ជននេះត្រូវបានគេចាត់ទុកថា ជាតួអង្គដ៏សំខាន់នៅក្នុងកងកម្លាំងនគរបាលឥស្លាមដែលអាចចេញបញ្ជា ហើយមន្រ្តីនគរបាល នឹងអនុវត្តតាម។

ការសម្រេចរយៈពេលជាប់ទោសរបស់លោក Al Hassan នឹងត្រូវបានកំណត់នៅពេលក្រោយ បន្ទាប់ពីមានសវនាការមួយជុំទៀត។ រូបគេប្រឈមមុខនឹងការកាត់ទោសអតិបរមា ដោយការជាប់ទោសពន្ធនាគារមួយជីវិត៕