ធនាគារកណ្តាលនៃប្រទេសអ៊ីតាលី បានរាយការណ៍ពីប្រតិបត្តិការផ្ទេរប្រាក់តាមធនាគារដោយខុសច្បាប់ កាលពីឆ្នាំមុន ពីគណនីអ៊ីតាលីទៅរុស្ស៊ី ដោយបញ្ជូនតាមបណ្តាប្រទេសផ្សេងទៀត ដើម្បីគេចពីទណ្ឌកម្មរបស់លោកខាងលិច។

គួរបញ្ជាក់ថា មហាអំណាចលោកខាងលិច បានដាក់ទណ្ឌកម្មយ៉ាងទូលំទូលាយលើទីក្រុងមូស្គូ បន្ទាប់ពីរុស្ស៊ីបានបើកការលុកលុយពេញលេញលើអ៊ុយក្រែន ក្នុងខែកុម្ភៈ ឆ្នាំ២០២២ ដែលចាប់តាំងពីពេលនោះមកត្រូវបានរឹតបន្តឹងបន្តិចម្តងៗ។ ហើយបណ្តាប្រទេសសហភាពអឺរ៉ុប ទើបបានអនុម័តកញ្ចប់ទណ្ឌកម្មលើកទី១៤ ប្រឆាំងនឹងទីក្រុងមូស្គូ កាលពីដើមសប្តាហ៍នេះ។

របាយការណ៍ឆ្នាំ២០២៣ ដោយអង្គភាពស៊ើបការណ៍ហិរញ្ញវត្ថុរបស់ធនាគារកណ្តាល បានឲ្យដឹងថា៖ «លទ្ធផល (នៃការស៊ើបអង្កេតប្រចាំឆ្នាំ) បាននាំឲ្យមានការកំណត់អត្តសញ្ញាណលំហូរខុសប្រក្រតីមួយចំនួន»។

តែយ៉ាងណាក្ដី របាយការណ៍នោះមិនបានផ្តល់ព័ត៌មានលម្អិតបន្ថែមទៀត អំពីការផ្ទេរដែលគេសង្ស័យ ឬអំពីប្រទេសពាក់ព័ន្ធនឹងការបញ្ជូនលុយកាក់ទាំងនោះទៅរុស្ស៊ីឡើយ។

របាយការណ៍ប្រចាំឆ្នាំនេះ ត្រូវប្រមូលព័ត៌មានអំពីករណីដែលអាចកើតមាននៃការសម្អាតលុយកខ្វក់ និងការផ្តល់ហិរញ្ញប្បទានភេរវកម្ម ហើយបន្ទាប់មកត្រូវសម្រេចថា តើព័ត៌មាននេះគួរតែត្រូវបានបញ្ជូនបន្តទៅអាជ្ញាធរស៊ើបអង្កេតដែរ ឬយ៉ាងណា៕