ប្រធានាធិបតីកេនយ៉ា លោក វីលៀម រូតូ (William Ruto) កាលពីថ្ងៃពុធ (២៦ មិថុនា) បានដកផែនការដំឡើងពន្ធ ដោយព្រមចុះចាញ់ទៅនឹងសម្ពាធពីក្រុមបាតុករដែលបានសម្រុកចូលសភា និងបានចាប់ផ្តើមបាតុកម្មនៅទូទាំងប្រទេស ព្រមទាំងបានគំរាមកំហែងធ្វើសកម្មភាពបន្ថែមទៀតនៅក្នុងសប្តាហ៍នេះ។

ជំហាននេះនឹងត្រូវបានគេមើលឃើញថាជាជ័យជម្នះដ៏សំខាន់មួយសម្រាប់ចលនាតវ៉ាដឹកនាំដោយយុវជន ដែលមានអាយុកាលមួយសប្តាហ៍ ហើយបានកើតឡើងពីការថ្កោលទោសតាមអ៊ិនធឺណិតនៃការដំឡើងពន្ធ ក្លាយទៅជាការប្រមូលផ្តុំតវ៉ាដ៏ធំទាមទារឱ្យមានការផ្លាស់ប្តូរផ្នែកនយោបាយ នៅក្នុងវិបត្តិដ៏ធ្ងន់ធ្ងរបំផុតនៃតំណែងប្រធានាធិបតីដែលមានរយៈពេលពីរឆ្នាំរបស់លោក រូតូ។

លោក រូតូ បានប្រកាសថា ខ្លួននឹងមិនចុះហត្ថលេខាលើសេចក្ដីស្នើច្បាប់ហិរញ្ញវត្ថុ រួមទាំងការដំឡើងពន្ធនោះទេ មួយថ្ងៃបន្ទាប់ពីការប៉ះទង្គិចគ្នារវាងនគរបាល និងក្រុមបាតុករនៅឯវិមានសន្និបាត និងទូទាំងប្រទេស បានបណ្តាលឱ្យមនុស្សយ៉ាងហោចណាស់ ២៣ នាក់ស្លាប់ និងជាច្រើននាក់ទៀតរងរបួស នេះបើយោងតាមក្រុមគ្រូពេទ្យ។

ប៉ុន្តែក្រុមបាតុករមួយចំនួនបាននិយាយនៅលើប្រព័ន្ធផ្សព្វផ្សាយសង្គមថា ទោះបីជាលោក រូតូ ព្រមលុបចោលផែនការពន្ធនេះក៏ដោយ ពួកគេនឹងបន្តការប្រមូលផ្តុំតវ៉ាដែលគ្រោងធ្វើនៅថ្ងៃព្រហស្បតិ៍នេះ ដោយមនុស្សជាច្រើនទាមទារឱ្យលោកប្រធានាធិបតីរូបនេះលាលែងពីតំណែង៕