រដ្ឋលេខាធិការក្រសួងមហាផ្ទៃ និងជាអនុប្រធានទី១ អាជ្ញាធរជាតិប្រយុទ្ធប្រឆាំងការជួញដូរមនុស្ស លោក ជំទាវ ជូ ប៊ុនអេង បានឆ្លើយតបចំពោះសហរដ្ឋអាមេរិក ដែលបានដាក់កម្ពុជាស្ថិតនៅចំណាត់ថ្នាក់លេខបី ពាក់ព័ន្ធនឹងការចាត់វិធានការលុបបំបាត់ ឬទប់ស្កាត់ការជួញដូរមនុស្ស ដោយលោកជំទាវបានចោទសួរទៅប្រទេសដែលតាំងខ្លួនឯងជាបិតាលទ្ធិប្រជាធិបតេយ្យនេះ ទទួលបានជោគជ័យហើយឬនៅចំពោះការទប់ស្កាត់បទល្មើស តាមរយៈ ponzi scheme នេះ។
តាមរយៈសារសំឡេងផ្ញើមកទូរទស្សន៍BTVតាមតេលេក្រាមនាព្រឹកថ្ងៃទី២៧ ខែមិថុនា ឆ្នាំ២០២៤ នេះ លោកជំទាវ ជូ ប៊ុន អេង បានថ្លែងថា ការដាក់ពិន្ទុះមកលើកម្ពុជាឲ្យស្ថិតនៅចំណាត់ថ្នាក់លេខបីនេះ ហាក់បីដូចជាមានលក្ខណៈផ្សេង ហើយប្រទេសទាំងនោះដូចជាមានការផ្គុំជើងគ្នាដើម្បីមកធ្វើការគាប់សង្កត់ដល់កម្ពុជា ខណៈកម្ពុជាបានកំពុងធ្វើកិច្ចខិតខំប្រឹងប្រែងយ៉ាងសកម្មចំពោះការទប់ស្កាត់ និងលុបបំ បាត់នូវអំពើជួញដូរមនុស្សនេះ។
លោកជំទាវបានសង្កត់ធ្ងន់ថា«ការដាក់ពិន្ទុះម្តងៗ គឺប្រទេសទាំងឡាយនោះ(ប្រទេសលោកខាង លិច)ដូចជាមានការផ្គុំជើងគ្នាដើម្បីមកសង្កត់កម្ពុជា បង្វែរទិសឲ្យលែងគិតខ្វាយខ្វល់ពីស្ថានភាពរបស់ប្រទេសខ្លួនឯង...តាមពិតទៅប្រទេសណាគឺមិនទាន់រួចខ្លួននោះដែរបើមានប្រជាពលរដ្ឋរបស់គាត់(អាមេរិក) មករងគ្រោះនៅកម្ពុជាមានន័យថាបទល្មើសហ្នឹងវាកើតឡើងនៅទីនោះដែរ វាគ្រាន់តែផ្ទេរប្តូរគ្នាចុះឡើង តែប៉ុណ្ណោះ ហើយគាត់មានវិធានការក្នុងការទប់ស្កាត់បានត្រឹមត្រូវហើយឬនៅ? ហើយបើបានវាគ្មានប្រជា ពលរដ្ឋរបស់គាត់មកកម្ពុជាដើម្បីប្រព្រឹត្តបទល្មើស ឬក៏ជាជនរងគ្រោះនោះទេ។ សូម្បីតែប្រទេសមហាអំ ណាចអាមេរិកខ្លួនឯងហ្នឹង ក៏មានប្រជាពលរដ្ឋរបស់គាត់រងគ្រោះដែរ អញ្ចឹងសួរថានេះឬជាភាពអសមត្ថ ភាពរបស់អាមេរិក? ខណៈករណីនេះសព្វថ្ងៃនេះប្រទេសណាក៏រកពិធីដោះស្រាយដែរ(ការទប់ស្កាត់ការជួញដូរមនុស្សតាមប្រព័ន្ធបច្ចេកវិទ្យា ឬponzi scheme)នេះ»។
សូមបញ្ជាក់ថា ប៉ុន្មានថ្ងៃកន្លងទៅនេះក្រសួងការបរទេសសហរដ្ឋអាមេរិក បានចេញរបាយការណ៍ ថាកម្ពុជាមិនទាន់បានបំពេញនូវស្តង់ដាក្នុងការលុបបំបាត់ការជួញដូរមនុស្ស និងមិនបានខិតខំប្រឹងប្រែង ក្នុងការអនុវត្តច្បាប់ការប្រឆាំងការជួយដូរមនុស្ស ដោយគេបានដាក់កម្ពុជាស្ថិតនៅក្នុងចំណាត់ថ្នាក់ទាប់បំផុតពោលគឺលេខ៣។ តែយ៉ាងណាក៏ដោយលោកជំទាវ ជូ ប៊ុនអេង បានចាត់ទុករបាយការណ៍នេះថាធ្វើ ឡើងហាក់បីដូចជាមិនបានឆ្លុះបញ្ចាំងគ្រប់ជ្រុងជ្រោយ និងមានលក្ខណៈបង្វែរទិសពីស្ថានភាពរបស់ប្រ ទេសខ្លួនឯងតែប៉ុណ្ណោះ៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
