​ប្រណាំង​ម៉ូតូ៖ ​ព្រឹត្តិការណ៍​ប្រណាំង​ម៉ូតូ GP , Malaysian Grand Prix នៅលើ​ទឹកដី​ម៉ាឡេស៊ី​ត្រូវបាន​ប្រកាស​លុបចោល​ហើយជា​លើក​ទី២ ដោយសារ​បញ្ហា​កូ​វីដ​-១៩​។ ​ការធ្វើដំណើរ​ចូល​ប្រទេស​ម៉ាឡេស៊ី​នៅតែ​មានការ​រឹតបន្តឹង​នៅឡើយ ដោយ​អ្នកដំណើរ​ទាំងអស់​ត្រូវ​ធ្វើ​ច​ត្តា​ឡី​ស័ក ជាក់ស្តែង​ប្រទេស​ក្នុង​ចក្រភព​អង់គ្លេស​ស្ថិតក្នុង​បញ្ជី​ក្រហម​របស់​ម៉ាឡេស៊ី​។​​

ការប្រកួត​នៅ​ម៉ាឡេស៊ី​នៅ​ទីលាន Sepang គ្រោង​រៀបចំ​នៅ​ខែតុលា នៅពេលនេះ​កាលវិភាគ​ដែល​ចំហរ​នេះ​ត្រូវបាន​ជំនួស​ដោយ​ទីលាន Misano ភាគ​ខាងជើង​ប្រទេស​អ៊ីតាលី នេះ​បើតាម​ការប្រកាស​របស់​សហព័ន្ធ​កីឡា​ប្រណាំង​ម៉ូតូអន្តរជាតិ FIM​។​ ​មានន័យថា​ ទីលាន Misano ប្រទេស​អ៊ីតាលី​នឹង​ត្រូវ​រៀបចំ​ ២​ប្រកួត​តែម្តង​ពោលគឺ​នៅ​ថ្ងៃទី១៩ ខែកញ្ញា និង​ថ្ងៃទី២៤ ខែតុលា​។​ ​ទីលាន Sepang ប្រទេស​ម៉ាឡេស៊ី​តែងតែ​រៀបចំ​ការប្រកួត​ម៉ូតូ GP ជាប្រចាំ​តាំងពី​ឆ្នាំ ១៩៩១ ទើបតែ​វិបត្តិ​កូ​វីដ​-១៩ នេះ​ទេ​ដែល​ម៉ាឡេស៊ី​ខកខាន ២ឆ្នាំ​ជាប់​គ្នា​។

​​ក្រោយ ១១ទីលាន​រដូវ​កាល​នេះ​កីឡាករ​បារាំង Fabio Quartararo គឺជា​អ្នក​នាំមុខគេ​ក្នុង​តារាង​ជើងឯក​ពិភពលោក ​តាម​ពីក្រោយ​ដោយ​កីឡាករ​អ៊ីតាលី Francesco Bagnaia និង​លេខ៣ កីឡាករ​អេ​ស្ប៉ា​ញ Joan Mir​។ ​ម៉ូតូ GP នឹង​បន្ត​ដល់​ជុំ​ទី២ ចុងខែ​នេះ​នៅ​ទឹកដី​អង់គ្លេស​ទីលាន Silverstone៕

​អត្ថបទ​៖​នាង សុភា​វុ​ធ