អ្នកនាំពាក្យរបស់ចិនដីគោកកាលពីថ្ងៃពុធសប្ដាហ៍នេះ បានរិះគន់ការអត្ថាធិប្បាយរបស់មេដឹកនាំថ្មី កោះតៃវ៉ាន់លោក ឡៃ ឆីង-ទ័(Lai Ching-te)ដែលថាភាគីទាំងពីរនៃច្រកសមុទ្រតៃវ៉ាន់ មិនស្ថិតក្រោមការគ្រប់គ្រងគ្នាទៅវិញទៅមក ដោយគូសបញ្ជាក់ថាការលើកឡើងរបស់លោកគឺជាប្រភេទពាក្យសម្ដីបំភាន់ការពិតនៃឯករាជ្យភាពកោះតៃវ៉ាន់។  

លោកស្រី ជូ ហ្វឹងលៀន (Zhu Fenglian) អ្នកនាំពាក្យការិយាល័យកិច្ចការកោះតៃវ៉ាន់នៃក្រុមប្រឹក្សារដ្ឋចិន បានចេញសេចក្តីថ្លែងការណ៍ឆ្លើយតបទៅនឹងសំណួរអំពីបទសម្ភាសន៍នាពេលថ្មីៗនេះរបស់ លោកឡៃ ជាមួយទស្សនាវដ្តី TIME អំឡុងពេលលោកអះអាងថាច្រកសមុទ្រតៃវ៉ាន់មិនស្ថិតក្រោមអំណាចអ្នកផ្សេងទេ។  

លោកស្រី ជូ បាននិយាយថា ទាំងចិនដីគោក ទាំងកោះតៃវ៉ាន់ គឺជាចិនតែមួយ ហើយកោះតៃវ៉ាន់ជាផ្នែកមួយរបស់ចិន។ នេះជាការពិតដែលមិនអាចកែប្រែបានឡើយ។ លោកស្រីក៏បានរិះគន់ការលើកឡើងរបស់លោក ឡៃ ផងដែរ ថាជាការនិយាយគ្មានការពិត និងខ្វះទាំងមូលដ្ឋានប្រវត្តិសាស្ត្រ និងផ្លូវច្បាប់ ដែលគ្រាន់តែចង់បង្ហាញចេតនាផ្តាច់ខ្លួនរបស់លោកប៉ុណ្ណោះ។   

ទាក់ទងនឹងការផ្លាស់ប្តូរ និងកិច្ចសហប្រតិបត្តិការឆ្លងច្រកសមុទ្រ លោក ស្រី បាននិយាយថា ចិនដីគោកតែងតែគាំទ្រ និងជំរុញការសន្ទនា និងការពិគ្រោះយោបល់រវាងភាគីទាំងពីរនៃច្រកសមុទ្រតៃវ៉ាន់ដោយផ្អែកលើការឯកភាពឆ្នាំ១៩៩២៕