កម្លាំងមូលដ្ឋានកងរាជអាវុធហត្ថស្រុកស្អាង ខេត្តកណ្ដាល នៅថ្ងៃទី២៦ ខែមិថុនា ឆ្នាំ២០២៤ បានចាប់ខ្លួនជនសង្ស័យ២នាក់ ពាក់ព័ន្ធករណីជួញដូរ រក្សាទុក និងប្រើប្រាស់គ្រឿងញៀន​ខុសច្បាប់ នៅចំណុចភូមិព្រែកតាវ៉ា ឃុំទឹកវិល ស្រុកស្អាង ខេត្តកណ្តាល។

របាយការណ៍របស់កម្លាំងអាវុធហត្ថបានឲ្យដឹងថា ជនសង្ស័យទី១៖ឈ្មោះ អូន ស៊ីវឃុន អាយុ​៣៧ឆ្នាំ វត្ថុតាងចាប់យក រួមមានម្សៅក្រាមសថ្លាសង្ស័យជា​​សារធាតុញៀន ចំនួន១៩កញ្ចប់, សម្ភារប្រើប្រាស់មួយចំនួន, ទូរស័ព្ទចំនួន០១គ្រឿង និងទី២៖ឈ្មោះ ហេង សុខហៀង អាយុ​២០ឆ្នាំ ដកហូតបានម្សៅក្រាមពណ៌សថ្លាសង្ស័យជាសារធាតុញៀន ចំនួន០១កញ្ចប់ធំ, ទូរស័ព្ទ​ចំនួន១គ្រឿង ម៉ូតូចំនួន១គ្រឿង។

សូមជម្រាបថា នៅថ្ងៃទី២២ ខែមិថុនា ឆ្នាំ២០២៤ អាជ្ញាធរជាតិប្រយុទ្ធប្រឆាំងគ្រឿងញឿន បាន​ទទួលព័ត៌មានពីប្រជាពលរដ្ឋតាមរយៈ App NoDrug ថានៅភូមិព្រែកតាវ៉ា ឃុំទឹកវិល ស្រុកស្អាង មានការជួញដូគ្រឿងញៀន។ នៅថ្ងៃដដែលនោះអាជ្ញាធរជាតិ ក៏បានបញ្ជូនព័ត៌មានខាងលើ មក​លេខា​ធិការដ្ឋាន គ្រឿងញៀនខេត្តកណ្តាល ដើម្បីឲ្យសមត្ថកិច្ចស្រាវជ្រាវ។

ករណីនេះ កម្លាំងអាវុធហត្ថស្រុកស្អាង និងជំនាញខេត្ត បានធ្វើការស្រាវជ្រាវស្គាល់មុខសញ្ញា ក៏​ចាប់​ផ្តើមឃ្លាំមើលនូវសកម្មភាពមុខសញ្ញាខាងលើ លុះនៅវេលាម៉ោង១៨៖១៥នាទី ថ្ងៃទី២៦ ខែ​មិថុនា ឆ្នាំ២០២៤ ក៏ចុះបង្រ្កាបជាក់ស្តែងតែម្តង។ បច្ចុប្បន្នជនសង្ស័យ និង​វត្ថុតាង​អាវុធ​ហត្ថ​ស្រុកស្អាង កំពុងចាត់ការបន្តតាមនីតិវិធីច្បាប់៕