ជនជាតិអ៊ីស្រាអែល ដែលត្រូវបានចាប់ធ្វើជាចំណាប់ថ្នូរ ឬបាត់បង់មនុស្សជាទីស្រឡាញ់ ក្នុងអំឡុងការវាយប្រហារថ្ងៃទី ៧ ខែតុលា របស់ក្រុមហាម៉ាស កំពុងប្តឹងទីភ្នាក់ងារអង្គការសហប្រជាជាតិ ដែលជួយប៉ាឡេស្ទីន ដោយអះអាងថា ខ្លួនបានជួយផ្តល់ហិរញ្ញប្បទានដល់ក្រុមសកម្មប្រយុទ្ធដោយបើកប្រាក់ខែឲ្យបុគ្គលិកទីភ្នាក់ងារនេះ ជាប្រាក់ដុល្លារអាមេរិក ហើយដោយហេតុនេះ បានបញ្ជូនប្រាក់ទាំងនោះ ទៅឲ្យអ្នកប្តូរប្រាក់ នៅតំបន់ហ្កាហ្សា។

ប៉ុន្តែទីភ្នាក់ងារដែលគេស្គាល់ថា UNWRA បានប្រាប់សារព័ត៌មាន AP កាលពីថ្ងៃអង្គារថា បុគ្គលិក ត្រូវបានបើកប្រាក់ខែឲ្យ ជាប្រាក់ដុល្លារ តាមជម្រើសរបស់ពួកគេ។ តំបន់ហ្កាហ្សា និងតំបន់វេសបែង ដែលកាន់កាប់ដោយអ៊ីស្រាអែល មិនមានរូបិយប័ណ្ណជាតិផ្ទាល់ខ្លួនរបស់ពួកគេទេ ហើយប្រើប្រាស់ប្រាក់សេកែល (shekels) របស់អ៊ីស្រាអែល ជាចម្បង។

ពាក្យបណ្តឹងដែលបានដាក់កាលពីថ្ងៃចន្ទ នៅក្នុងតុលាការសហព័ន្ធរបស់សហរដ្ឋអាមេរិក ក្នុងទីក្រុង       ញូវយ៉ក គឺជាបញ្ហាប្រឈមចុងក្រោយបំផុតចំពោះទីភ្នាក់ងារអង្គការសហប្រជាជាតិ ដែលជាអ្នកផ្គត់ផ្គង់អាហារ ទឹក និងទីជម្រកដ៏សំខាន់ ដល់ជនស៊ីវិល ក្នុងអំឡុងសង្គ្រាមអ៊ីស្រាអែល និងក្រុមហាម៉ាស។ រដ្ឋាភិបាលអ៊ីស្រាអែល បានវាយប្រហារភ្នាក់ងារដែលមានអាយុជាង ៧០ឆ្នាំ ជាយូរមកហើយ ហើយមានការត្រួតពិនិត្យបានកាន់តែខ្លាំងឡើង ក្នុងអំឡុងពេលសង្រ្គាមរយៈពេល ៨ខែ ដែលជំរុញឲ្យ UNRWA ការពារខ្លួន ខណៈពេលដែលកំពុងប្រឈមនឹងវិបត្តិមនុស្សធម៌ដែលកំពុងកើនឡើង នៅក្នុងតំបន់ហ្កាហ្សា។