អ្នកធ្វើធម្មយាត្រារាប់រយនាក់ដែលបានបាត់បង់ជីវិត ដោយសារកម្ដៅក្ដៅខ្លាំង ក្នុងពិធីបុណ្យហាជី នាឆ្នាំនេះ មិនត្រូវបានចុះឈ្មោះជាផ្លូវការជាមួយអាជ្ញាធររបស់ប្រទេសអារ៉ាប៊ីសាអ៊ូឌីតនោះឡើយ ដោយសារតែបែបនោះ ទើបមនុស្សជាច្រើនមិនអាចទទួលបានសេវាសំខាន់ៗ ដូចជាឡានក្រុងមានម៉ាស៊ីនត្រជាក់ និងតង់ត្រជាក់ជាដើម។

ការស្លាប់ដ៏ច្រើននេះបានបង្ហាញពីបញ្ហាប្រឈមដែលកំពុងលេចឡើង សម្រាប់អ្នករៀបចំ ខណៈដែលបម្រែបម្រួលអាកាសធាតុកើតមាននៅក្នុងតំបន់ ដែលមានដូចជាការអនុវត្តតម្រូវឲ្យមានការអនុញ្ញាតផ្លូវការ សម្រាប់ពិធីបុណ្យបែបនេះជាដើម កំពុងជំរុញឲ្យមានការព្រួយបារម្ភថា អ្នកធ្វើធម្មយាត្រាដែលមិនបានចុះឈ្មោះ អាចប្រឈមនឹងសីតុណ្ហភាពគំរាមកំហែងដល់អាយុជីវិតកាន់តែខ្លាំងឡើងៗ។

ក្នុងពេលជាមួយគ្នានេះ ការចំណាយខ្ពស់សម្រាប់កញ្ចប់ចូលរួមពិធីបុណ្យហាជីផ្លូវការ កំពុងជំរុញឲ្យប្រជាជនអ្នកកាន់សាសនាឥស្លាមមួយចំនួនជ្រើសររើសផ្លូវមិនផ្លូវការដែលមានតម្លៃថោកជាង ដើម្បីធ្វើដំណើរទៅកាន់ពិធីបុណ្យនេះ ទោះបីជាការធ្វើបែបនេះមិនមានការអនុញ្ញាតក៏ដោយ ហើយលើសពីនោះទៀតចំណេញលើការបន្ធូរបន្ថយការទប់ស្កាត់លើប្រភេទទិដ្ឋាការរបស់អារ៉ាប៊ីសាអ៊ូឌីតមួយចំនួនទៀត។

ក្នុងបទសម្ភាសន៍មួយជាមួយប៉ុស្តិ៍ទូរទស្សន៍អារ៉ាប៊ីសាអ៊ូឌីត Al-Arabiya អ្នកនាំពាក្យសន្តិសុខនៃក្រសួងមហាផ្ទៃអារ៉ាប៊ីសាអ៊ូឌីត លោកវរសេនីយ៍ឯក Talal bin Shalhoub បាននិយាយថា កង្វះលិខិតអនុញ្ញាតរបស់អ្នកធ្វើធម្មយាត្រាដែលមិនបានចុះឈ្មោះ បានធ្វើឲ្យមានការលំបាក ក្នុងការផ្តល់សេវា និងការថែទាំដល់ពួកគេ។

តែអ្នករិះគន់រដ្ឋាភិបាល លើកឡើងថា អ្នកធ្វើធម្មយាត្រាទាំងអស់ ទោះស្ថិតក្នុងស្ថានភាពបែបណាក៏ដោយ គួរតែត្រូវបានការពារពីអាកាសធាតុក្ដៅ ហើយបានចោទប្រកាន់ថា អាជ្ញាធរនៅឆ្នាំនេះ បង្រ្កាបលើអ្នកចូលរួមដែលគ្មានការអនុញ្ញាត៕