ប្រធានាធិបតីអ៊ុយក្រែនលោក វ្ល៉ូឌីមី ហ្ស៊េឡិនស្គី ( Volodymyr Zelenskyy) និងមេបញ្ជាការយោធា លោក Oleksandr Syrskyi កាលពីថ្ងៃពុធ បានទៅសួរសុខទុក្ខកងទ័ព នៅក្នុងតំបន់ដូណិតស្ក៍    ( Donetsk) ភាគខាងកើតដែលបានទទួលរងការវាយលុកតាមជើងគោក និងតាមអាកាសយ៉ាងសាហាវរបស់រុស្ស៊ី ក្នុងរយៈពេលប៉ុន្មានខែថ្មីៗនេះ។

កងទ័ពរបស់វិមានក្រឹមឡាំង បានបង្កើនកិច្ចខិតខំប្រឹងប្រែងរបស់ខ្លួន ដើម្បីបណ្តេញកងកម្លាំងអ៊ុយក្រែនដែលហត់នឿយ និងអស់អាវុធ ដែលកំពុងកាន់កាប់តំបន់ភាគខាងកើត និងភាគឦសាន។ ពួកគេ មានគោលបំណងចាប់យកដីបន្ថែមទៀត ក្នុងអំឡុងពេលនិទាឃរដូវ និងរដូវក្តៅ ខណៈដែលវាលភក់ បានរីងស្ងួត ដែលអនុញ្ញាតឲ្យគ្រឿងយុទ្ធោបករណ៍ធុនធ្ងន់ ចល័តចូលទៅក្នុងទីតាំងសំខាន់ៗ នៅទូទាំងតំបនជនបទនេះ។

ប្រទេសរុស្សី បានបញ្ចូលផ្នែកនៃតំបន់ដូណិតស្ក៍ និងតំបន់ចំនួនបីផ្សេងទៀតជាឧបសម្ព័ន្ធរបស់ខ្លួន ដោយខុសច្បាប់ ក្នុងឆ្នាំ ២០២២ ភ្លាមៗ បន្ទាប់ពីខ្លួនបានឈ្លានពានអ៊ុយក្រែន ហើយវិមានក្រឹមឡាំង បានចាត់ទុកការគ្រប់គ្រងទាំងអស់នៃតំបន់ដូណិតស្ក៍ ជាអាទិភាព។ ទីក្រុងមូស្គូ កំពុងសម្លឹងរកមើលការទាញយកអត្ថប្រយោជន៍របស់ខ្លួន នៅក្នុងកងទ័ព និងសព្វាវុធ មុនពេលអ៊ុយក្រែន អាចទទួលបានការផ្គត់ផ្គង់បន្ថែមពីលោកខាងលិចដែលបានសន្យាផ្តល់ទៅឲ្យជួរមុខ។