ទិដ្ឋភាពនៃការបំផ្លិចបំផ្លាញធ្ងន់ធ្ងរ ត្រូវបានឃើញនៅតំបន់ Antioquia ភាគពាយព្យប្រទេសកូឡុំប៊ី កាលពីថ្ងៃពុធ (ទី២៦ ខែមិថុនា) បន្ទាប់ពីអាកាសធាតុមិនល្អ បានបង្កឲ្យមានជាបំណាក់ដី ដែលបានធ្វើឲ្យផ្ទះសម្បែងរងការខូចខាត ដោយល្បាប់ភក់ និងកម្ទេចកម្ទីមានពាសពេញផ្លូវលំនៅឋាន។

យ៉ាងណាក្ដី គិតត្រឹមព្រឹកថ្ងៃព្រហស្បតិ៍ (ទី២៧ ខែមិថុនា) មិនទាន់មានអ្នកបាត់បង់ជីវិត ត្រូវបានបញ្ជាក់ជាផ្លូវការនៅឡើយទេ ប៉ុន្តែមនុស្ស ៧នាក់ត្រូវបានរាយការណ៍ថា កំពុងបាត់ខ្លួន។ នេះបើយោងតាមរបាយការណ៍ក្នុងស្រុក។ បំណាក់ដីនេះត្រូវបានកំណត់ថា បង្កឡើងដោយភ្លៀងធ្លាក់ខ្លាំង។

ទីក្រុងដ៏តូច Venecia គឺជាកន្លែងមួយដែលរងគ្រោះខ្លាំងបំផុតរបស់តំបន់ Antioquia។ អ្នកស្រុកបានជួបជុំគ្នាយ៉ាងឆាប់រហ័ស ដើម្បីជួយសម្អាតកម្ទេចកម្ទី និងជួសជុលផ្ទះសម្បែងឡើងវិញ៕