ភ្នំពេញ ៖ តំណាងអង្គការសុខភាពពិភពលោក (WHO) ប្រចាំនៅប្រទេសកម្ពុជា អ្នកស្រី លី អាឡែន បានថ្លែងអះអាងថា រាជរដ្ឋាភិបាលកម្ពុជាគ្រប់គ្រង និងទប់ស្កាត់បានយ៉ាងល្អដោយមិនឲ្យការផ្ទុះរាតត្បាតនូវមេរោគកូវីដ១៩ជាទ្រង់ទ្រាយធំជាងនេះ ហើយការចាក់វ៉ាក់សាំង និងអនុវត្តវិធានការជាប្រចាំដូចបច្ចុប្បន្ននេះ វានឹងកាត់បន្ថយអត្រាឆ្លងនូវមេរោគដ៏កាចសាហាវ បានកាត់តែច្រើននាពេលអនាគត។

 ថ្លែងប្រាប់អ្នកសារព័ត៌មាន ខណៈចុះយកថវិកា និងអំណោយគ្រឿងឧបភោគបរិភោគរបស់សម្តេចតេជោ ហ៊ុន សែន ជូនលោកយាយអាយុ១០៨ឆ្នាំនៅខេត្តរតនគិរី នាថ្ងៃទី២០ ខែសីហា ឆ្នាំ២០២១នេះ អ្នក ស្រី លី អាឡែន បានលើកឡើងថា ការគ្រប់គ្រងរបស់រាជរដ្ឋាភិបាលកម្ពុជា បានល្អប្រសើដោយសារតែការឆ្លងវាស្ថិតនៅទ្រឹង ដោយមិនបណ្តោយឲ្យផ្ទុះធ្ងន់ធ្ងរជាងនេះ ហើយបានទប់ស្កាត់អត្រានៃការស្លាប់ក៏ស្ថិតនៅកម្រិតទាប់ផងដែរ។

 ​ជាមួយគ្នានោះដែរ អ្នកស្រី លី អាឡែន ក៏បានថ្លែងកោតសរសើរចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការស្វះស្វែងរកវ៉ាក់សាំងប្រឆាំងមេរោគកូវីដ១៩ ចាក់ជូនដល់ប្រជាពលរដ្ឋរបស់ខ្លួនបានយ៉ាងលឿន និងប្រកបដោយប្រសិទ្ធភាពផងដែរ ខណៈអត្រានៃការចាក់វ៉ាក់សំាងនៅប្រទេសកម្ពុជានេះ មានកម្រិតខ្ពស់ជាងគេដោយរហូតដល់ជាង៨០ភាគរយហើយនោះ។

​យ៉ាងណាក៏ដោយតំណាងអង្គការសុខភាពពិភពលោករូបនេះ ក៏បានបន្តអំពាវនាវដល់​បងប្អូនប្រជាពលរដ្ឋខ្មែរ​ទាំងអស់បន្តប្រុងប្រយ័ត្ន​ឲ្យបានខ្ពស់បន្ថែមទៀតផងដែរ ដោយត្រូវអនុវត្តឲ្យបានខ្ជាប់ខ្ជួននៅវិធានការរបស់ក្រសួងសុខាភិបាល ដែលបានដាក់ជូននាពេលកន្លងទៅ ហើយមួយវិញទៀតបើមិនចាំបាច់ខ្លាំងទេក៏មិនត្រូវជួបជុំគ្នា និងដើរប្រសេចប្រសាចផងដែរ៕អត្ថបទ ៖ ចក់