ប្រទេសរុស្ស៊ីកាលពីថ្ងៃពុធ បានព្រមានកូរ៉េខាងត្បូង អំពីការផ្គត់ផ្គង់អាវុធដ៏គ្រោះថ្នាក់របស់ខ្លួន ដល់អ៊ុយក្រែន ដោយនិយាយថា វានឹងនាំឲ្យប៉ះពាល់ធ្ងន់ធ្ងរដល់ទំនាក់ទំនងទ្វេភាគី។

អ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova បានប្រាប់អ្នកយកព័ត៌មាន នៅទីក្រុងមូស្គូថា៖«យើងចង់ព្រមានសាធារណរដ្ឋកូរ៉េប្រឆាំងនឹងជំហានខ្វះការពិចារណាដែលអាចនាំឲ្យមានផលវិបាកដែលមិនអាចផ្លាស់ប្តូរបាន សម្រាប់ទំនាក់ទំនងរុស្ស៊ី-កូរ៉េខាងត្បូង»។

អ្នកការទូតរូបនេះ បាននិយាយថា រុស្ស៊ីនឹងតាមដានឲ្យបានដិតដល់បំផុត នៅពេលដែលអាវុធ និងឧបករណ៍របស់កូរ៉េខាងត្បូង ត្រូវបានបញ្ជូនទៅឲ្យភាគីអ៊ុយក្រែន ដោយបានបន្ថែមថា ការផ្គត់ផ្គង់អាវុធដ៍ដ៏គ្រោះថ្នាក់របស់ទីក្រុងសេអ៊ូលដល់ទីក្រុងគីវ នឹងនាំឲ្យទំនាក់ទំនងរវាងរុស្ស៊ី និងកូរ៉េខាងត្បូង កាន់តែយ៉ាប់យ៉ឺន។

កាលពីសប្តាហ៍មុន របាយការណ៍ក្នុងស្រុក បានដកស្រង់សម្តីការិយាល័យប្រធានាធិបតីកូរ៉េខាងត្បូង ដោយនិយាយថា ទីក្រុងសេអ៊ូល នឹងពិចារណាឡើងវិញនូវលទ្ធភាពនៃការផ្តល់អាវុធដ៍គ្រោះថ្នាក់ ដល់អ៊ុយក្រែន បន្ទាប់ពីរុស្ស៊ី និងសាធារណរដ្ឋប្រជាមានិតប្រជាធិបតេយ្យកូរ៉េ បានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយរួចនោះ។