ប្រទេសថៃ នៅថ្ងៃព្រហស្បតិ៍ (ទី២៧ ខែមិថុនា) នេះ បានប្រកាសលទ្ធផលនៃការបោះឆ្នោតដ៏ស្មុគស្មាញជាច្រើនជុំរបស់ខ្លួន ដើម្បីជ្រើសរើសព្រឹទ្ធសភាថ្មី ដែលជាការបោះឆ្នោតលើកដំបូង សម្រាប់សភាជាន់ខ្ពស់ គិតចាប់តាំងពីមានរដ្ឋប្រហារយោធា កាលពី ១ទសវត្សរ៍មុន។

សមាជិកព្រឹទ្ធសភាជាប់ឆ្នោតថ្មី មិនត្រូវបានគាំទ្រដោយគណបក្សនយោបាយនោះទេ ដែលធ្វើឲ្យវាពិបាកនិយាយថា អ្នកណាទទួលបានជ័យជម្នះ ប៉ុន្តែអ្នកវិភាគបានលើកឡើងថា ពួកគេភាគច្រើនជាសម្ព័ន្ធមិត្តនឹងគណបក្សអភិរក្សនិយម គឹគណបក្ស Bhumjaithai (ភូមិចៃថៃ)។

សមាជិក ២០០នាក់ ដែលត្រូវបានជ្រើសរើសនៅក្នុងដំណើរការបោះឆ្នោត ៣ជុំ ដែលមិនមានការបោះឆ្នោតជាសាធារណៈពេញលេញនោះ រួមបញ្ចូលនូវចំនួនដ៏ច្រើននៃអតីតមន្ត្រីរាជការ យោធា និងនគរបាល។

ក្រុមអ្នកវិភាគបាននិយាយថា លទ្ធផលនេះអាចបង្កឲ្យមានការលំបាកដល់រដ្ឋាភិបាលដែលដឹកនាំដោយគណបក្ស Pheu Thai (ភឿថៃ) របស់លោកនាយករដ្ឋមន្ត្រី សេដ្ឋា ថាវីស៊ីន បើទោះបីជាគណគណបក្សភូមិចៃថៃ ជាផ្នែកនៃរដ្ឋាភិបាលចម្រុះក៏ដោយ។

គួរបញ្ជាក់ថា សមាជិកព្រឹទ្ធសភាត្រូវបានជ្រើសរើសមិនមែនមកពីគណបក្សនយោបាយទេ ប៉ុន្តែតំណាងឲ្យស្ថាប័នការងារចំនួន ២០ ដែលក្នុងនោះរួមមានទាំងផ្នែកយុត្តិធម៌ ការអប់រំ សុខភាពសាធារណៈ ឧស្សាហកម្ម សិល្បៈ និងកីឡា ក្រុមមនុស្សចាស់ និងជនជាតិភាគតិច។

ព្រឹទ្ធសភាបច្ចុប្បន្នបានដើរតួនាទីយ៉ាងសំខាន់ បន្ទាប់ពីមានការបោះឆ្នោតសកល កាលពីឆ្នាំមុន ដោយបានរារាំងលោក Pita Limjaroenrat ជាមេដឹកនាំគណបក្សដែលទទួលបានអាសនៈភាគច្រើន មិនឲ្យក្លាយជានាយករដ្ឋមន្ត្រី៕